«Han shatyrdaǵy» jasandy jaǵajaıda balalardyń hlor býyna ýlanýyna olardyń atalǵan orynda uzaq ýaqyt bolýy, sondaı-aq allergııalyq tózimsizdigi áser etken bolýy múmkin - J. Bekshın

Bul týraly búgin elimizdegi epıdemıologııalyq jaǵdaıǵa qatysty Densaýlyq saqtaý mınıstrliginde ótken baspasóz máslıhatynda memlekettik sanıtarlyq-epıdemıologııalyq qadaǵalaý departamenti bas basqarmasynyń dırektory Jandarbek Bekshın málim etti.

Esterińizge sala keteıik, keshe elordadaǵy «Han Shatyr» saýda, oıyn-saýyq keshenindegi jasandy jaǵajaıda uzaq ýaqyt bolǵan 6-10 jastaǵy bes bala «hlor býyna ýlaný» dıagnozymen 2- balalar aýrýhanasyna túsken bolatyn.

«Alǵashqy medıtsınalyq járdemnen keıin, saǵat 22-ge taman balalardyń jaǵdaıy qanaǵattanarlyq dep baǵalandy. Degenmen, táýlik boıy jiti qadaǵalaýda bolyp, búgingi kúni olar aýrýhanadan shyqty», - deıdi J. Bekshın. Onyń aıtýynsha, «Han Shatyr» keshenindegi jasandy jaǵajaıdy tekserý barysynda onda ornalasqan úsh basseınnen hlor qaldyǵyna 45 synama alynyp tekserilgen. Ol sýlarda hlor kontsentratsııasynyń mólsherden artýy anyqtalmady. «Budan soń, aýanyń 55 núktesinen synama alyndy. Sonyń tek 1-eýinde ǵana hlordyń shamadan artyq ekendigi anyqtaldy. Ol núkte tolqyn shyǵaratyn basseıinde bolyp otyr. Al ýlaný sebebine kelsek, balalar álgi jasandy jaǵajaıdaǵy 30 gradýstyq temperatýrada 10 saǵat boıy bolǵan. Sonymen qatar, osy kúni basseınde 190 adam túskeni, onyń 62-si balalar ekendigi belgili boldy. Degenmen, medıtsınalyq kómekke atalǵan azamattardyń ishinen tek bir otbasyndaǵy 5 bala júginip otyr. Soǵan qaraǵanda, balalardyń ýlanýyna negizinen basseıinde uzaq ýaqyt bolýy, olardyń sharshaýy, sondaı-aq balalardyń hlor preparattaryna allergııalyq tózimsizdigi de sebep bolǵanǵa uqsaıdy. Osynyń bári jınaqtalyp kelip, jeńil ýlanýǵa soqtyrǵan bolýy múmkin», - deıdi J. Bekshın.

Oqıǵadan soń, keshen ıeleri sanıtarlyq-epıdemıologııalyq qyzmettiń qaýlysynsyz-aq basseındi jaýyp, sebepti anyqtaý úshin 50 tekshe metrge tarta sýdy aǵyzǵan. «Buǵan deıin dál osyndaı oqıǵa tirkelmegen. Keshendi jaldaǵan kásipkerler oqıǵa sebebin anyqtaýǵa ózderi de qulshynyp otyr. Sondyqtan da, «Han shatyrdaǵy» basseın qazirgi ýaqytta jumys istemeıdi»,- dedi J. Bekshın.