«Han Shatyrdaǵy» bala óliminen keıin mekteptegi lagerler jabyla ma
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova elordadaǵy «Han Shatyr» saýda, oıyn-saýyq ortalyǵynyń basseıninde mektep oqýshysynyń ólimine qatysty túsinik berdi, dep habarlaıdy QazAqparat tilshisi.
«Keshe bizdiń qyzmetkerlerimiz oqıǵa ornynda boldy. Baqylaýda ustap otyrmyz. Adamdardyń jaýapkershiligi men qaýipsizdikti kúsheıtý qajettigin aıttyq. Sol jerde bolǵan kýágerlerdiń aıtýynsha, bul jaıt óte jyldam, qysqa ǵana ýaqyttyń ishinde oryn alǵan», - dedi bilim mınıstri Úkimet otyrysynan keıin BAQ ókilderiniń saýalyna oraı.
Sonymen qatar ol balalardy sýǵa júzýge úıretýdi uıymdastyrýǵa qatysty Bilim jáne Іshki ister mınıstrlikteriniń buıryǵy bar ekendigin eske saldy.
«Mundaı jumys júrgizilip jatyr. Jazǵy lagerde jumys isteıtin adamdarǵa qatysty aıtar bolsam, árbir muǵalim balalar ómiriniń qaýipsizdigi úshin jaýapty. Sondyqtan olar oqýdan ótedi», - dedi ol.
Osy rette mınıstr atalǵan oqıǵaǵa baılanysty mektepter janyndaǵy lagerlerdiń jabylatyny týraly aqparattyń qańqý sóz ekendigin aıtty.
«Mektep lagerleri burynǵy rejimde jumys isteı beretin bolady. Qatańdatýǵa qatysty aıtar bolsam, adamdardy jınap, taǵy bir márte ony qalaı júrgizý kerektigin, buıryq bolýy tıistigin túsindirdik», - dedi K.Shámshıdınova.
Osy oqıǵaǵa qatysty QR Іshki ister mınıstri Erlan Turǵymbaev ta pikir bildirip, qylmystyq is qozǵalǵanyn aıtqan edi.
Eske salaıyq, 3 maýsym kúni «Han Shatyr» SOSO basseıninde qyz bala sýǵa batyp ketti. Tergeý amaldary júrgizilip jatyr.
