«Han otaý» qazaq jazýshylarynyń rýhanı ordasy bolar edi - jazýshy R.Otarbaev
ASTANA. Qyrkúıektiń 1-i. QazAqparat /Arman Asqarov/ - Astanadaǵy qazaq jazýshylarynyń bas qosatyn rýhanı ortasy bolýy qajet. Búgin elordada ótken «Shyǵarmashylyq bılet» qoǵamdyq birlestiginiń birinshi otyrysynda jazýshy Raqymjan Otarbaev osy máseleni kóterdi, dep habarlaıdy QazAqparat.
«Sońǵy 6 jyldyń ishinde Astanada bar 92 jazýshy 80 adam bolyp bir-aq ret jınaldy. Osydan úsh jyl buryn. 20-30 adam bolyp bir-aq kitapty talqylappyz. Nege? Sebebi Astanada jazýshylardyń bas qosatyn orny joq. Mine, qarańyz, elordada qanshama syrty jyltyrap turǵan ǵımarat bar. Biraq onyń bireýinen de qazaq jazýshylaryna oryn tabylmaı otyr. Bizde rýhanı ortany qalyptastyratyn jerimiz joq. Máselen, qazirgi kezde elordada «Han shatyr» bar. Nege biz ózimizdiń bas qosatyn «Han otaýymyzdy» qurmaımyz. Qazirgi kezde bul is jyljyp jatyr. Ortasyna ekiqabatty qazaqtyń kıiz úıin qoıamyz. Aınalasyna tórt-bes kıiz úı tigemiz. Júırik attardy baılaımyz. Al ortasyna qobyz únimen sýburqaqty jiberip qoıamyz. Mine, bul bizdiń rýhanı ortamyz bolar edi», - deıdi R.Otarbaev.
