«Han Qoryq» jastar festıvali stýdentterdi kıeli Ulytaýdyń tarıhymen tanystyrady
Jastar festıvaline Almaty, Astana, Qaraǵandy, Jezqazǵan qalalarynan barlyǵy jeti ýnıversıtettiń stýdentteri qatyspaq. Bul týraly búgin Ortalyq kommýnıkatsııalar qyzmetinde ótken brıfıng barysynda Qazaqstan ulttyq geografııalyq qaýymdastyǵy dırektorynyń ǵylymı jáne halyqaralyq jobalar jónindegi orynbasary Sáýlet Sákenov málim etti.
"Qazirgi tańda festıvalge 88 adam, ıaǵnı, jastar qatysatynyn rastap otyr. Áýel basta qatysýshylar sanyn 100 adamǵa jetkizý kózdelgen edi. Biraq, áli ótinishter qabyldanyp jatyr. Festıval aıasynda stýdentterdiń ǵylymı konferentsııasyn ótkizemiz, sonymen qatar, Qazaqstan ulttyq geografııalyq qoǵamy tarapynan spıkerler baıandama jasaıdy. Festıvalge qatysýshy stýdentterdiń ózi de qazaq halqynyń tarıhyna qatysty qyzyqty baıandamalar jasasa, tek qup kóremiz",-deı kele S.Sákenov festıvaldiń baǵdarlamasymen tanystyrdy.
"Festıval 18-22 tamyz aralyǵynda kıeli Ulytaý óńirinde ótedi. 17 tamyz kúni festıval qatysýshylary Astanadan Jezqazǵan qalasyna jolǵa shyǵady. Qaraǵandyǵa toqtap, biraz zertteýshilerdi ertip alamyz. Jezqazǵanǵa jetken soń lager tigip, kelesi kúni festıval jumysyn bastaımyz. Festıval bastalǵan kúni jastarǵa tusaýkeser saltyn kórsetip, balany atqa mingizemiz. Festıvaldiń ekinshi kúni tolyqtaı Ulytaý óńirin tanýǵa, ıaǵnı, tanymdyq ekspedıtsııaǵa arnalady. Jastarǵa Ulytaýdaǵy qasıetti mekenderdi kórsetip, tarıhı oryndardyń syryn aıtamyz. Úshinshi kúni stýdentterdiń konferentsııasyn ótkizip, jastar arasynda kıiz úı tigýden jarys ótkizemiz. Bul stýdent jastarǵa óte qyzyqty jarys bolady dep oılaımyn, sebebi, stýdentterdiń arasynda kıiz úı tikpek túgili, ony óz kózimen kórmegender de bar shyǵar. Al, festıval aıaqtalatyn kúni Ulytaýdaǵy qasıetti shyńǵa shyǵamyz, Altyn shoqyǵa baryp, sol jerlerdiń tarıhymen tanysatyn bolamyz",-dedi ol.
S.Sákenov festıvalge stýdent jastardan basqa sharaǵa qyzyǵýshylyq tanytqan kez kelgen adam qatysa alatynyn aıtty. Tipti, ol Avstralııa elinen bir týrıst qyz qatysatynyn da jetkizdi. Eger Siz de "Han Qoryq" festıvaline qatysamyn deseńiz, myna silteme boıynsha tirkeýden ótýińizge bolady. https://kazgeography.org/ru/node/656.
