Han Keneniń alǵashqy ult-azattyq kóterilis bastaǵan bekinisiniń ornynda eskertkish taqta ornatylsa ıgi - A. Smaıyl
ASTANA. Sáýirdiń 21-i. QazAqparat /Qanat Mámetqazyuly/ - Han Keneniń alǵashqy ult-azattyq kóterilis bastaǵan bekinisiniń ornynda eskertkish taqta ornatylsa ıgi. Búgin QR Parlamenti Májilisiniń jalpy otyrysynda depýtat Aldan Smaıyl Úkimet basshysynyń atyna joldaǵan saýalynda osy máseleni kóterdi,
dep habarlaıdy QazAqparat.
«Kenesary hannyń Orynbor general-gýbernatoryna jazǵan haty: «Men Kenesary Qasymov qolǵa qarý alyp, uly kúresti basqarýǵa attandym...»,- dep bastalady. Qazaq halqyna qysymdy toqtatý, Saryarqany órmekshiniń toryndaı shyrmap tastaǵan segiz dýan men bir-birine qoldyń salasyndaı jalǵasqan bekinisterdi joıý jónindegi talaby oryndalmaǵannan soń, Han Keneniń basqa amaly qalmaǵan edi. Qalyń el qaırattanyp atqa qondy, ulan dala «Táýelsizdik» dep urandady. Namysty eldiń bári Aqmolada toǵysty. Dýlattan shyqqan Buǵybaı, Tabyn Jolaman, Qypshaq Basyqara, Arǵyn Jekebatyr, Atyǵaı Ańǵal, Shubyrtpaly Aǵybaı, Súıindik Janaıdar bastaǵan qalyń qol 1838 jylǵy mamyrdyń 25-inde Aqmoladaǵy bekinisti tikeleı shabýylmen tas talqan etti. Sol joıqyn kúres 27 jylǵa sozyldy», dedi A. Smaıyl.
Onyń aıtýynsha, qazaq eliniń búkilhalyqtyq sıpatqa ıe bolǵan osy alǵashqy ult-azattyq kóterilisine bıyl 172 jyl tolady. Osy rette depýtat atalmysh kóterilistiń 165 jyldyǵy qarsańynda Astananyń zııaly qaýymy bekinis turǵan jerge eskertkish belgi ornatyp, esil erlerdiń qaharmandyǵyn ardaqtaý týraly ótinish jasalǵanyn aıtty. Biraq bundaı usynys aıaqsyz qalypty.
«Bálkim elordada Kenesary eskertkishi bar ǵoı degen shyǵar. Alaıda azattyq úshin Han Kenemen birigip talaı batyrlar shaıqasqan joq pa? Sondyqtan el tarıhyndaǵy uly oqıǵa, alǵashqy ult azattyq kóterilisin dara qurmetteý qajet. Sol úshin Táýelsizdigimizdiń 20 jyldyǵynda bul ótinishti qaıta kóterip otyrmyz. Ult erligin, halyq qaharmandyǵy men qarııa tarıhty qadirleı alatyndyǵymyz ras bolsa, osy joly talap-tilegimiz eskeriler dep senemiz», dedi A. Smaıyl.
