Han esimin ıelengen soń álsizdikke qaqym joq: Jánibek Álimhanuly kezekti jekpe-jegine daıyndalyp jatyr

ASTANA. QazAqparat - Birer kúnnen keıin kásipqoı bokstaǵy besinshi kezdesýine shyqqaly otyrǵan boksshy Jánibek Álimhanuly osy jekpe-jeginde de qazaqy boks stılin kórsetýge ýáde berdi, dep habarlaıdy QazAqparat tilshisi.

«Jánibek han - Qazaq handyǵynyń negizin qalaǵan handardyń biri. Eńseli el bolý jolyndaǵy Kereı men Jánibektiń eńbegi tarıhta altyn árippen jazýly. Ult úshin ólsheýsiz eńbek etti. Bizge de azan shaqyryp han esimi qoıylǵan soń, álsiz bolýǵa qaqymyz joq. Babalardaı uly is atqara almasaq ta, týdy qulatpaı, namysty bermeı, jeńispen eldi qýantý - negizgi mindetim dep esepteımin. Taqymqysar aǵaıynǵa myń alǵys. Muhıttyń arǵy betinde jankúıerlikterińizdi sezinip júrmin. Besinshi jekpe-jekke de az kún qaldy. Jeksenbide amerıkalyqtarǵa Qazaqtyń boks stılin kórsetemiz, buıyrtsa. Jeńiste júzdeseıik. Tý jelbiresin!», - dep jazdy boksshy Instagram paraqshasynda.

Aıta ketsek, buǵan deıin qazaqstandyq sportshy 2 aqpan kúni Amerıkanyń Frısko qalasynda (Tehas, AQSh) Sergeı Kovalev pen Eleıder Alvares revanshynyń anderkardynda jekpe-jek ótkizetinin habarlaǵan bolatyn. BoxRec.com saıtynyń málimetinshe, Jánibektiń besinshi jekpe-jegindegi qarsylasy - AQSh ókili, The Hitman (jaldamaly kisi óltirýshi) atalyp ketken boksshy Stıven Martınes (18-4, 13 KO).

Eske sala keteıik, Jánibek Álimhanuly tórtinshi jekpe-jegin ótken jyldyń qarasha aıynda amerıkalyq «Jyrtqysh» laqap atty Aleksandr Vonmen ótkizip, tóreshiler sheshimimen jeńiske jetken edi.