«Han Abylaı: tanym men taǵylym» atty kólemdi jınaq jaryq kórdi
El bılegen handar men sultandar, batyrlar men bıler halyqty tutastyqqa uıystyrýda, qazaq jurtyn syrtqy jaýdan qorǵaý, eldiń táýelsizdigi men jerdiń tutastyǵyn, birligin saqtaý jolynda qaıratkerlik tanyta bildi. Sondaı iri qaıratkerdiń biri - Abylaı han.
Kórnekti memleket qaıratkeri, aty ańyzǵa aınalǵan Abylaı hannyń ǵumyrnamasy men atqarǵan isteri týraly halyq derekteri molynan saqtalyp jetken. Halyq tanymynda Abylaı qazaq jerin jaýdan qorǵaý, onyń azattyǵyn saqtaý jolynda erekshe erlik kórsetken batyr, eldiń birligin jarastyrǵan dana bıleýshi retinde ardaqtalady. Kitapta ataqty hannyń el júreginde saqtalǵan beınesi men halyqtyń bıleýshi týraly tanym-taǵylymy taldanady.
Kólemdi jınaqta Abylaı hannyń balalyq shaǵynan bastap el basqarǵan kezeńi, qaıratkerlik qyzmeti, danalyǵy, keıingi urpaqqa qaldyrǵan úlgi-ónegesi, tarıhtaǵy orny men róli jan-jaqty kórinis tapqan.
Kitaptyń kelesi bir qosymsha bóligi Abylaı han týraly ańyzdardan quralǵan. Munyń ishinde kóptegen ańyz-áńgimeler Máshhúr Júsip Kópeıulynyń jazbalarynan alynǵan. Sondaı-aq Shákárim Qudaıberdiulynyń shyǵarmalarynan da úzindiler berilgen.
Buqar jyraý, Úmbeteı jyraý jáne Tátiqara aqynnyń Abylaıǵa aıtqan jyr-tolǵaýlary da jınaqqa enip otyr.
Osy eńbekti jazý barysynda paıdalanylǵan ádebıetterdiń ózi 140-tan asady. Onyń ishinde shetel jáne qazaq ǵalymdarynyń eńbekterine silteme jasalǵan, jyr-dastandar kórsetilgen.
«Abylaı han qazaq tarıhynyń asa kúrdeli, el taǵdyry qıyn-qystaý kúı keshken HVІІІ ǵasyrda ómir súrdi. Ult, el bolashaǵyna qatty qater týǵyzǵan «Aqtaban shubyryndy, Alqakól sulama» kezeńinde saıası sahnaǵa kóterilgen Abylaı qazaq handyǵynyń memlekettiń nyshandaryn saqtap qalǵan qaıratker retinde tanyldy. Onyń bıleýshi qaıratkerlik qyzmeti el júregine uıalap, halyqtyń súıispenshiligine bólendi», - dep qorytyndy oı túıedi kitap avtorlary.