Hamıtov ózin sózben túırep ótken armenııalyq MMA sheberimen jekpe-jekke shyqqysy keledi
ASTANA. QazAqparat - Qazaqstandyq MMA sheberi Qýat Hamıtov ózin áleýmettik jelide sózben túırep ótken armenııalyq faıter Davıd Hachatrıanmen jekpe-jekke shyqqysy keledi. Bul týraly sportshy Instagramdaǵy paraqshasynda jazdy, dep habarlaıdy QazAqparat tilshisi.
Aıta ketsek, buǵan deıin Davıd Hachatrıan Hamıtovtyń burynǵy qarsylasy Pıter Kýıllımen jekpe-jekke shyǵyp, nokaýtpen utylǵan bolatyn. Atalmysh jekpe-jek bolardyń aldynda Qýat Hamıtov Kýıllıdiń aıqasty ýaqytynan buryn aıaqtaıtynyn jazǵan edi. Dese degendeı, Hamıtovtyń aıtqany aıdaı kelip, Hachatrıan jeńiliske ushyrady. Aıqas aıaqtalǵasyn Hamıtov óziniń Instagramynda:
«Eı, @fightnights (reseılik promoýterlik kompanııa - avt.)! Men senderdiń barlyǵyńa alapat Kýıllıdiń aıqasty merziminen buryn aıaqtaıtynyn aıtqan edim ǵoı. Al sender senbedińder», - dep jazǵan edi.
Dál osyǵan kelgende Hachatrıan shydamaı ketse kerek. Іle-shala otandasymyzǵa Instagramynda jaýap bergen.
«Olar burynǵy meni umytyp ketipti. Qazir kóp sóıleý moda bolyp ketti. Tek túsinbeıtinim, myna «Qýattar» men «Alıevtar» (ol da synaǵan - avt.) men oktagondy bastap júrgen kezde qaıda júrdi? Bálkim, sıyr saýyp júrgen bolar... Al qazir MMA sheberleri bolyp shyǵa kepti. Qýat, sóıleı bergenshe, jylqy etin jep júre bermeısiń be», - delingen sportshynyń jazbasynda.
Jaýap ózin kóp kúttirgen joq. Qazaqstandyq Instagramdaǵy paraqshasynda oǵan qysqa da nusqa jaýap berdi.
«@fightnights bul aıqasty uıymdastyryńdar!», - dep jazdy Qýat Hamıtov.
