Hamıt Erǵalıevke eskertkish ornatyldy
ASTANA. KAZINFORM – Aqyn, Memlekettik syılyqtyń ıegeri, Qazaqstannyń Halyq jazýshysy Hamıt Erǵalıevtiń qurmetine eskertkish ashyldy. Bul týraly QR Jazýshylar odaǵynyń baspasóz qyzmeti habarlady.
Qazir aqynnyń esimimen atalatyn burynǵy Qamysqala aýylyna ornatylǵan eskertkishtiń ashylýyna Hamıt Erǵalıevtiń týystary men nemeresi Aıdar Muratuly arnaıy qatysty.
Eskertkishtiń ashylý rásimi barysynda aqynnyń ómiri men shyǵarmashylyǵyna arnalǵan kórme uıymdastyryldy. Arnaıy uıymdastyrylǵan kórmege qalamger tutynǵan jazý mashınkasy, kózildirigi men qalamsaby, fotosýretteri qoıyldy.
Aqyn, Qazaqstannyń halyq jazýshysy, Qazaqstan Memlekettik syılyǵynyń laýreaty Erǵalıev Hamıt 1916
jyly Atyraý oblysynda dúnıege keldi.
Qazaq memlekettik ýnıversıtetin bitirgen. Uly Otan soǵysyna qatysqan.
1945-1950 jyldary - «Sotsıalıstik Qazaqstan» (qazirgi «Egemen Qazaqstan») gazetiniń ádebı qyzmetkeri. 1950-1957 jyldary - Qazaqstan Jazýshylar odaǵy poezııa sektsııasynyń meńgerýshisi. 1958-1959 jyldary Qazaqstan memlekettik ádebıet baspasy poezııa sektsııasynyń meńgerýshisi bolǵan.
Aqynnyń 30-ǵa tarta jyr jınaqtary, «Áke syry», «Úlken joldyń ústinde», «Bizdiń aýyldyń qyzy», «Qurmanǵazy», «Kúı dastan», «Jyldar, jyldar» atty poemalary bar. Aqyn poezııasynda Azamat soǵysynyń otty jyldary, Ýkraın halqynyń uly aqyny T.Shevchenko taǵdyry, akademık, kompozıtor A.Jubanov beınesi, dáýirimizdiń basqa da ózekti máseleleri kórkem beınelengen.
Sonymen qatar onyń qalamynan týǵan áńgimeler men estelikter, ádebı maqalalar men esseler de bar. Ol D.Baıronnyń, P.Nerýdanyń, N.Hıkmettiń, A.Pýshkınniń, M.Lermontovtyń, A.Nekrasovtyń, V.Maıakovskııdiń, R.Ǵamzatovtyń, A.Sýrkovtyń keıbir poezııalyq týyndylaryn, Shekspır sonetterin qazaq tiline aýdarǵan. Qyrǵyz halqynyń «Manas», qaraqalpaq halqynyń «Qyryq qyz» epostaryn qazaq tiline tárjimalaýǵa at salysqan. Aqynnyń óz shyǵarmalary da birqatar shet el tilderine aýdarylǵan.
Eki márte Eńbek Qyzyl Tý, «Qurmet belgisi», 1-2-shi dárejeli Otan soǵysy ordenderimen, medaldarmen marapattalǵan.
Aıta keteıik, Astanadaǵy «Alash qaıratkerleri» eskertkishine gúl shoqtaryn qoıý rásimi ótti.