Hamıd Karzaı NATO-nyń ushqyshsyz ushaqtaryna «esigin» tars japty
ASTANA. 19 aqpan. QazAqparat - Kabýl qalasynda áskerı akademııa shákirtteriniń aldynda sóz sóılegen Aýǵanstan Prezıdenti Hamıd Karzaı NATO jaýyngerleriniń el turǵyndaryna áýeden soqqy berýine jol bermeıtinin málimdedi.
Osy maqsatta ol jeksenbi kúni arnaıy qaýlyǵa qol qoıýdy kózdep otyr, dep jazady muslim.kz.
Onyń bulaı málimdeme jasaýyna osydan bir apta buryn Kýnar provıntsııasyndaǵy atystan 10 beıbit turǵynnyń, sonyń ishinde, áıelder men balalardyń qaza tabýy sebep boldy. Bul soqqy «ál-Kaıdamen» baılanysy bar tálipterdiń kózin joıý operatsııasyna qatysqan aýǵan komandıriniń suraýy boıynsha berilgen bolatyn. Nátıjesinde «ál-Kaıdanyń» shekpeninen shyqqan úsh sodyrdyń kózi joıylyp, sonymen qatar beıbit turǵyndar da qaza tapqan.
Aýǵanstandaǵy áskerı operatsııa barysynda beıbit turǵyndardyń da zardap shegýi - el bıligi men NATO kúshteriniń qarym-qatynasyna syzat túsirgen bolatyn.
Buǵan qosa, el Prezıdenti aýǵan áskeriniń eldegi jaǵdaıdy syrtqy kúshterdiń kómeginsiz-aq baqylaýda ustap, tynyshtyq pen tártipti qamtamasyz ete alatynyn jetkizdi.
«Bizdiń ulttyq qaýipsizdik kúshimiz 2014 jyldyń sońyna qaraı eldegi jaǵdaıdy birqalypty ustap turýǵa daıyn. Aýǵandyqtarǵa shet eldiń kómegi qajeti emes», - dep málimdedi el Prezıdenti.
2014 jyldyń sońyna deıin NATO áskeri aýǵan aýmaǵynan ketetini josparlanýda.
