Hameneı Rýhanıdi Iran prezıdenti laýazymyna bekitti
ASTANA. 4 tamyz. QazAqparat - Hasan Rýhanı resmı túrde Iran prezıdenti laýazymynda Mahmud Ahmadınejadty aýystyrdy. Irannyń joǵarǵy kóshbasshysy aıatolla Álı Hameneı Tegeranda ótken arnaıy saltanatta Rýhanıdiń saılanýyn maquldady, dep habarlady Bı-Bı-Sı.
Bul saltanat Iranda bıliktiń aýysqanyn bildiredi. Rýhanıdi ulyqtaý saltanaty jeksenbi kúni Iran parlamentinde ótedi.
Maýsymda ótken prezıdenttik saılaýda jeńiske jetken 64 jastaǵy din qyzmetkeri reforma jasaýǵa jáne Irannyń halyqaralyq oqshaýlanýyn toqtatýǵa ýáde berip otyr.
Rýhanı parlamentte ártúrli qyzmetter atqardy, sondaı-aq Irannyń ıadrolyq problemalar jónindegi kelissózderine qatysty, biraq Ahmadınejad ony bul rólinen aıyrdy. Ol 1979 jylǵy Irandaǵy revolıýtsııaǵa deıin ıslam belsendisi boldy.
«Men ózgeristerdi jáne jaqsy ómirdi qalaıtyn, sybaılas jemqorlyqty, kedeıshilik pen kemsitýdi joıǵysy keletinderdiń, ózin qurmetteıtin ján óziniń ar-namysyn joǵary qoıyp, bolshaqqa úmittenetinderdiń qoldaýymen jaýapkershilikti óz moınyma alamyn», dedi Rýhanı senbidegi saltanatta.
Rýhanıdi reforma jaqtastary qoldaıdy, olar jańa prezıdentten naqty ózgeristerdi, sonyń ishinde saıası sottalǵandardyń bosatylýyn jáne el ekonomıkasyna salmaq túsirip otyrǵan halyqaralyq sanktsııalardy joıýdy kútedi.
Alaıda Rýhanı prezıdent oryntaǵyna otyrǵanymen, ózekti sheshimder qabyldaýda ol basty ról atqarmaıdy. Islam respbýblıkasynda sońǵy sózdi prezıdent emes, Joǵarǵy kóshbasshy aıtady, dep túsindiredi Bı-Bı-Sı tilshisi.
Jumada Ierýsalım kúnindegi mıtıngide sóılegen sózinde Rýhanı ızraıldiń palestınalyq aýmaqty jaýlaýyn «ıstam áleminiń denesindegi eski jara» dep atady jáne ırandyq kóshbasshylardyń palestınalyqtardy qoldaǵan jáne Izraıldi aıyptaǵan sózderin qaıtalady.
Iran 1979 jylǵy Islam revolıýtsııasy kezinen beri Izraıldyń ómir súrý quqyǵyn joqqa shyǵaryp keledi.
Kóptegen ırandyqtar eki merzim boıy prezıdent oryntaǵynda bolǵan Ahmadınejad eldi ekonomıkalyq kúızeliske ushyratty jáne syrtqy álemmen qarama-qaıshylyqty kúsheıtti dep sanaıdy.
