HAMAS tutqyndarǵa kómek kórsetýge kelisti: biraq Izraılden áýe shabýyldaryn toqtatýdy talap etti

ASTANA. KAZINFORM – HAMAS qozǵalysynyń áskerı qanaty eger Izraıl turaqty gýmanıtarlyq dálizder ashyp, áýe shabýyldaryn toqtatsa, Qyzyl Kresttiń Gaza sektoryndaǵy tutqyndarǵa azyq-túlik pen dári-dármek jetkizý týraly ótinishin qarastyrýǵa daıyn ekenin málimdedi. Bul týraly Kazinform agenttiginiń menshikti tilshisi habarlady.

«Biz Qyzyl Kresttiń kez kelgen ótinishine oń jaýap berýge daıynbyz. Ol úshin jetkizý kezinde shabýyldar toqtatylyp, turaqty gýmanıtarlyq dálizder ashylýy qajet», – delingen HAMAS-tyń áskerı bólimshesi sanalatyn «Izz ad-Dın ál-Kassam» brıgadalarynyń málimdemesinde.

Bul málimdeme Izraıl tutqynynda otyrǵan Evıatar Davıdtiń vıdeoúndeýinen keıin jarııalandy. Vıdeoda ol ábden álsiregen kúıde óziniń «qabirin qazyp» jatqanyn aıtady. Atalǵan beınematerıal Batys elderiniń tarapynan qatań synǵa ushyrady. Frantsııa, Germanııa, Ulybrıtanııa jáne AQSh HAMAS-tyń áreketin aıyptady.

Al BUU Qaýipsizdik Keńesi bul máseleni seısenbi kúni arnaıy otyrysta talqylamaq.

Izraıl bıliginiń málimetinshe, qazirgi ýaqytta Gaza sektorynda 50-ge jýyq tutqyn bar, olardyń shamamen 20-sy ǵana tiri bolýy múmkin. Qaqtyǵys bastalǵaly gýmanıtarlyq uıymdar olardyń jaǵdaıyna kóz jetkize almaı keledi. Týystary da tutqyndar jaıly naqty aqparattan qaǵylǵan.

Izraıl premer-mınıstri Bınıamın Netanıahý jeksenbi kúni Halyqaralyq Qyzyl Krest komıtetin tutqyndarǵa gýmanıtarlyq kómek kórsetýge shaqyrdy. Uıym bul kómekti dereý bastaýǵa daıyn ekenin málimdep, tutqyndarǵa qoljetimdilikti qaıta talap etti.

«Beınejazbalar tutqyndardyń ómirine qaýip tóndiretin jaǵdaıdy tikeleı dáleldeıdi. Olar medıtsınalyq kómek pen adamgershilikpen qaraýdy alýy tıis», – delingen Halyqaralyq Qyzyl Krest komıtetiniń málimdemesinde.

Tutqyndardyń týystary qurǵan forým HAMAS-ty «tózgisiz jaǵdaı jasaý» úshin aıyptap, tutqyndardy dereý bosatýdy talap etti.

«HAMAS ár tutqyn úshin tolyq jaýapty. Olardy bosatqanǵa deıin top olardy barlyq qajetti zattarmen qamtamasyz etýge mindetti», – delingen otbasylardyń málimdemesinde.

Sonymen qatar, Gaza sektoryndaǵy gýmanıtarlyq ahýal ýshyǵyp barady. Palestınanyń Densaýlyq saqtaý mınıstrligi jeksenbi kúni jarııalaǵan málimetke sáıkes, sońǵy táýlikte ashtyq pen álsireýden taǵy alty adam, onyń ishinde balalar kóz jumǵan. Jalpy alǵanda, toıyp tamaq ishpeýden qaıtys bolǵandar sany 175-ke jetti.

Izraıl jeksenbi kúni BUU arqyly aýrýhanalar, naýbaıhanalar jáne qoǵamdyq ashanalar qajettilikteri úshin Gaza sektoryna janarmaı jetkizýge ruqsat berdi. Bul týraly okkýpatsııalanǵan palestınalyq aýmaqtarda gýmanıtarlyq kómekti úılestirýmen aınalysatyn Izraıldiń COGAT áskerı qurylymy habarlady.

Aıta keteıik, Gazada ashtyqtan qaza tapqandar sany 175 adamǵa jetti.