HAMAS Tramptyń josparyna jaqyn arada jaýap beredi

ASTANA. KAZINFORM – HAMAS AQSh prezıdenti Donald Tramptyń Gaza sektorynda atysty toqtatyp, tutqyn almasý jónindegi josparyna jaqyn arada jaýap beredi, dep habarlaıdy Anadoly.

Qozǵalystyń saıası bıýrosynyń múshesi Mýhammed Nezzal óziniń BAQ úshin jarııalaǵan málimdemesinde jospar jarııalana salysymen, ıaǵnı 30 qyrkúıekten bastap, HAMAS palestınalyq toptar, táýelsiz qaıratkerler men el ishindegi jáne syrtyndaǵy araǵaıyndarmen keńese bastaǵanyn aıtty. 

Arada pikir qaıshylyǵy bolǵanyna qaramastan qozǵalys ókilderi bul máselege salmaqty, baıyppen qarap otyr.

HAMAS jospardy jan-jaqty qarastyryp, jaqyn arada jaýabyn beredi. Bul rette qozǵalys ókilderi Palestına halqy men Palestına isiniń strategııalyq ustanymdaryn nazarǵa alatyndaryn aıtty.

- Biz josparmen tolyq kelisemiz ne kelispeımiz degen kózqarasty ustanbaımyz jáne biz bireýdiń qorqytyp-úrkitýimen ne qysymymen áreket etpeımiz,-dedi ol HAMAS-tyń eń aldymen Palestına halqynyń múddesi men saıası tepe-teńdik aıasynda áreket etetindikterin eskerte otyryp. 

- Biz kelisimge kelýge umtylyp jatyrmyz,- deı kele Nezzal josparǵa qatysty ózderiniń ustanymdary tek ýaqytsha shekteýler emes, Gazada eki jyl qatarynan jalǵasyp kele jatqan jappaı qyryp-joıý áreketterin toqtatý ekenin jetkizdi. 

- Biz bul qandy qasaptyń úshinshi jylǵa sozylýyn qalamaımyz. Sol sebepti biz halqymyzǵa qarsy jasalyp jatqan jappaı kisi ólimin toqtatýdy qalaımyz, - dedi ol. 

Aıta keteıik, 29 qyrkúıek kúni Aq úı AQSh prezıdenti Donald Tramptyń 20 bólimnen turatyn «Gazadaǵy qaqtyǵysty toqtatýdyń keshendi jospary» atty usynysyn jarııalaǵan bolatyn.

Tramp Izraıl premer-mınıstri Bınıamın Netanıahýmen birge ótkizgen baspasóz-máslıhaty barysynda eger jospar eki taraptan qabyldanatyn bolsa, soǵys toqtaıtynyn, al Izraıl óz áskerin Gazadan birtindep alyp ketetinin, sóıtip Gazada jańa ómir bastalatynyn aıtty. Bul rette ol jańa ómirge HAMAS qozǵalysynyń eshqandaı qatysy bolmaıtynyn, al tutqyndardyń barlyǵy bosatylatynyn atap ótti. Netanıahý bul jospardy qabyldady.

Buǵan deıin habarlaǵanymyzdaı, Tramptyń josparyn BUU Bas hatshysy da qoldady.

Tramp HAMAS-qa Gazadaǵy beıbitshilik josparyna jaýap berý úshin birneshe kún berdi.