HAMAS Tramp ákimshiligimen kelissózge daıyn

ASTANA. KAZINFORM – Palestınalyq HAMAS áskerılendirilgen toby AQSh prezıdenti Donald Tramp ákimshiligimen baılanys ornatyp, kelissóz júrgizýge daıyn ekenin bildirdi. Bul jaıynda HAMAS saıası bıýrosynyń joǵary laýazymdy múshesi Mýsa Abý Marzýk málim etti, dep habarlaıdy Kazinform agenttiginiń menshikti tilshisi. 

– Biz Tramp ákimshiligimen baılanysqa jáne kelissózderge daıynbyz. Buǵan deıin de Baıden, Tramp nemese AQSh ákimshiliginiń ózge qaı-qaısysymen de baılanys ornatýǵa qarsylyq bildirmedik. Barlyq halyqaralyq tarappen kelissózderge ashyqpyz, - dedi Abý Marzýk.

Marzýktiń málimdeýinshe, AQSh-pen kelissóz HAMAS úshin qajettilik bolyp tur deýge turarlyq. Óıtkeni, Vashıngton Taıaý Shyǵystaǵy negizgi oıynshy sanalady. 

– Mine, sondyqtan da biz amerıkalyqtarmen kelissózderge qoldaý bildirdik jáne bul máselege qarsylyq tanytpaımyz, - dep qosty Abý Marzýk.

Seısenbi kúni HAMAS delegatsııasy Máskeýde bolyp, RF SІM basshylyǵymen kezdesý ótkizdi.

Kúni keshe Tramp palestınalyqtar Gazaa sektorynan basqa jerge qonys aýdarǵannan keıin soǵystan qıraǵan aýmaqty AQSh baqylaýyna alatynyn jáne ony ekonomıkalyq turǵyda damytýmen aınalysatynyn aıtyp, ýáde bergen edi. Amerıka prezıdentiniń bul sózi qazirdiń ózinde Taıaý Shyǵys óńirinde, sonymen qatar keıbir amerıkalyq saıasatkerler arasynda synǵa ushyrap otyr.

HAMAS-tyń resmı ókili Samı Abý Zýhrı AQSh prezıdenti Donald Tramptyń Gaza sektoryn basyp alý týraly málimdemesi «kúlkili» ári «absýrd» ekenin málimdedi.

–Tramptyń Gazany baqylaýǵa alý nıeti týraly málimdemesi kúlki týdyrady ári aqylǵa syımaıdy. Mundaı sıpattaǵy kez kelgen ıdeıa óńirdegi jaýlyq otyn tutandyrýǵa túrtki bola alady, - dep málimdedi Abý Zýhrı Reuters agenttigine. 

HAMAS qozǵalysy saıası bıýrosynyń múshesi Izzat al-Rıshk Gaza qandaı da bir tarap onyń taǵdyryn sheshe alatyndaı ortaq aımaq emes, bul Palestına jeriniń basyp alynǵan ajyramas bóligi ekenin tilge tıek etti. 

Saýd Arabııasynyń Syrtqy ister mınıstrligi palestınalyqtardy óz jerinen qýdalaýǵa baǵyttalǵan kez kelgen áreketti qabyl almaıtyndyqtaryn málimdedi. Sonymen qatar astanasy Shyǵys Ierýsalım bolatyn táýelsiz Palestına memleketi qurylmaı Izraılmen dıplomatııalyq qarym-qatynas ornatpaıtyndyqtaryn ashyq aıtty. 

Buǵan deıin Gazadaǵy atysty toqtatý kelisiminiń ekinshi kezeńi bastalǵanyn jazǵan edik.