HAMAS-ty qarýsyzdandyrý máselesi: Beıbitshilik keńesi Izraılge delegatsııa jiberedi
ASTANA. KAZINFORM — AQSh prezıdenti Donald Tramptyń bastamasymen qurylǵan Beıbitshilik keńesiniń ókilderi Taıaý Shyǵysta Gaza beıbitshilik josparyn odan ári júzege asyrý boıynsha kelissóz júrgizedi.
Beıbitshilik keńesi HAMAS-ty qarýsyzdandyrý jáne Gaza sektoryndaǵy kelesi qadam boıynsha kelissóz júrgizý úshin Izraıl men Mysyrǵa delegatsııa jiberedi. Onyń quramyna AQSh prezıdentiniń keńesshisi Djared Kýshner, Beıbitshilik keńesiniń arnaıy ókili Nıkolaı Mladenov jáne Ulybrıtanııanyń burynǵy premer-mınıstri Tonı Bler kiredi.
The Times of Israel gazetiniń habarlaýynsha, delegatsııa jeksenbi kúni Izraılge barady. Kýshner premer-mınıstr Bınıamın Netanıahýmen jáne Izraıldiń basqa da joǵary laýazymdy sheneýnikterimen kelissóz júrgizýi tıis.
— AQSh pen Izraıl túpkilikti maqsat — HAMAS-ty demılıtarızatsııalaýǵa qarsy emes. Biz aıtylǵan qaýipterdi tyńdap, kelesi qadamdy talqylaımyz, — dedi Beıbitshilik keńesiniń ókili.
Negizgi taqyryp — 30 shildede maquldanǵan HAMAS-ty qarýsyzdandyrý josparyn júzege asyrý. Netanıahý usynylǵan josparǵa ashyq túrde qarsylyq bildirgennen keıin jospardyń odan ári ilgerileýi qıyndady.
President Trump's envoy Jared Kushner plans to visit Israel next week for Gaza talks. My story on @axios https://t.co/8O0QFoBz5Q
— Barak Ravid (@BarakRavid) August 13, 2026
Jaqynda Izraıl premer-mınıstri HAMAS tolyǵymen qarýsyzdanbaıynsha, atap aıtqanda, aýyr jáne jeńil qarýlaryn tapsyrmaıynsha, Izraıl qorǵanysy óz pozıtsııasynan sheginbeıtinin málimdedi.
The Times of Israel basylymynyń habarlaýynsha, Vashıngton Izraıldi Gaza sektoryna shabýylyn shekteýge jáne 2025 jyldyń qazan aıyndaǵy atysty toqtatý týraly kelisim boıynsha gýmanıtarlyq mindettemelerin oryndaýǵa kóndirýge úmittenedi. Beıbitshilik keńesi bul sharttardy oryndaý HAMAS-qa qarýdy is júzinde berýge múmkindik beredi dep sanaıdy.
Netanıahýdyń jospardy jarııa túrde synǵa alýyna qaramastan, Izraıl Gaza sektoryna shabýyl jasaýdan bir apta boıy bas tartty. Alaıda, osy aptada operatsııalar qaıta bastaldy. Beısenbi kúni Izraıl kúshteri HAMAS áskerı qolbasshysyn jáne polıtsııa bastyǵyn óltirdi.
Izraıldegi kelissózderden keıin Beıbitshilik keńesiniń delegatsııasy Kaırge barady, onda Mysyr jáne basqa da deldal elderdiń ókilderimen kezdesý josparlanǵan. Oǵan Qatar men Túrkııa ókilderi de qatysady.
Taraptar Gaza sektoryn demılıtarızatsııalaý, azamattyq jáne qaýipsizdik ókilettikterin HAMAS-tan Palestınanyń tehnokratııalyq úkimetine berý jáne keıin anklavty qalpyna keltirý josparyn iske asyrýdyń kelesi qadamdaryn aıqyndamaq.
Axios málimetinshe, Vashıngton 27 qazanda ótetin Izraıl parlamenti saılaýynyń Gaza josparynyń kelesi kezeńin iske asyrýǵa kedergi keltirmeýine kúsh salyp jatyr. Alaıda amerıkalyq sheneýnikter saılaýdyń jaqyndaýy Izraıl basshylyǵymen ymyraǵa kelýdi qıyndatyp otyrǵanyn moıyndaıdy.
Budan buryn Izraıl Batys jaǵalaýda palestınalyqtardyń 26 ǵımaratyn súrýge kiriskenin jazǵanbyz.
