HAMAS taǵy úsh ızraıldikti bosatty

ASTANA. KAZINFORM – Gaza sektoryndaǵy atysty toqtatý kelisimi aıasynda HAMAS senbi kúni taǵy úsh ızraıldikti tutqynnan bosatty. Onyń ornyna Izraıl 180-nen astam palestınalyqty túrmeden shyǵarýy kerek, dep habarlaıdy BBC.

Bul 19 qańtarda atysty toqtatý kelisimi kúshine engennen bergi tórtinshi tutqyn almasý. Aqpannyń 1-i kúni HAMAS Izraılge tutqynǵa alynǵan úsh adamnyń esimderin aıtty. Olardyń barlyǵy beıbit er azamattar. Áýeli ekeýi bosatylyp, Izraılge berildi. 

Sonyń biri - Nır-Oz jerinde eki balasymen tutqynǵa alynǵan 54 jastaǵy Ofır Kalderon (Eki balasy bosatylyp qoıǵan).

Ekinshisi - Nır Ozda HAMAS áskerıleriniń qolyna túsken 35 jastaǵy ıArden Bıbas. Sol kezde onyń qasynda Shırı esimdi áıeli men eki balasy - tórt jasar Arıel men 10 aılyq Kfır (balalardyń tutqynǵa túsken kezdegi jasy) boldy.

Belgili bolǵandaı, bul otbasyny Gazaǵa barar jolda eki bólip, ıArden Bıbas bir jarym jyl boıy bala-shaǵasynan jyraqta ustalǵan. Onyń áıeli men eki-balasy áli oralmady. Týystarynyń aıtýynsha, olar aman qaldy degen úmit oty kún ótken saıyn sónip barady.

Al 65 jastaǵy AQSh pen Izraıl elderiniń azamaty Kıt Sıgel búgin Izraılge berildi. Tutqynda bolǵan onyń áıeli 2023 jyldyń qarashasynda bosatylǵan edi.

Osyǵan deıin HAMAS-tyń kelesi bosatylatyn kepilge alynǵandardyń esimderin jarııalaǵanyn jazdyq.