HAMAS taǵy úsh ızraıldik tutqyndy bosatty

ASTANA.KAZINFORM  - Soǵysty toqtatý kelisimi aıasynda HAMAS Qyzyl Krest uıymyna kepilge alynǵan úsh adamdy tapsyrdy, dep habarlaıdy VVS.

Jaqyn kúnderi olar Izraılge jetkizilip, otbasylary men medıtsına qyzmetkerleri kútip alady.

Kepilge alynǵandardy bosatpas buryn HAMAS olardy sahnaǵa shyǵardy. Oqıǵa ornynda bolǵan jýrnalısterdiń habarlaýynsha, kepilge alynǵandar ábden sharshaǵan. Olar qońyr kóılek pen shalbar kıgen, qoldarynda bosatý kýálikteri bar.

Bir kún buryn HAMAS senbi kúni bosatylatyn ızraıldikterdi atady. Olardyń ishinde 53 jastaǵy Elı Sharabı, 56 jastaǵy Ohad Ben-Amı jáne 34 jastaǵy Or Levı bar. Or Levı Izraıldiń ońtústigindegi Nova festıvali kezinde qolǵa tústi. Onyń áıelin HAMAS sodyrlary óltirgen.

Elı Sharabı Beerıde tutqynǵa alyndy. Onyń áıeli men eki qyzy qaza tapty. Onymen birge onyń aǵasy Iossı de tutqynǵa alyndy. Ol qaıtys boldy, denesi HAMAS-tyń qolynda.

Ohad Ben-Amı de Beerıden. Onyń áıeli Raz Ben-Amı de urlanǵan jáne 2023 jyldyń qarashasyndaǵy bir aptaǵa sozylǵan atysty toqtatý kelisimi aıasynda bosatylǵan.

Aıta keteıik, bul almasý atysty toqtatý kelisimi 19 qańtarda kúshine engennen bergi besinshi almasý boldy. 1 aqpanda HAMAS taǵy úsh ızraıldikti, al Izraıl aıyrbas retinde 180-nen astam palestınalyq tutqyndy bosatqan.

Kelisimsharttyń birinshi kezeńi boıynsha bosatylatyn 33 ızraıldik kepilgerdiń ázirge 13-i úılerine oraldy, sonymen qatar HAMAS sodyrlary Taılandtyń bes azamatyn bosatty.

HAMAS senbide bosatylýy tıis kepildegi úsh ızraıldiktiń esimderin ataǵan bolatyn.