HAMAS soǵysty toqtatýǵa kelisti, alaıda Izraıl shabýyldy qoıatyn oıy joq
ASTANA. KAZINFORM – HAMAS dúısenbi kúni keshke Mysyr men Qatardyń Gaza sektorynda Izraılmen soǵysty toqtatý týraly usynysyn qabyldaǵanyn jarııalady. Degenmen Izraıl tarapy áli oılanyp jatyr, dep habarlaıdy Euronews.
HAMAS-tyń kelisimi Izraıl áskerı operatsııa aldynda 100 myń palestınalyqty ońtústiktegi Rafah qalasynan evakýatsııalaýǵa buıryq bergennen keıin birneshe saǵat ótkende belgili boldy.
Mysyr men Qatar tarapynan jasalǵan usynystyń egjeı-tegjeıi áli jarııalanǵan joq.
Associated Press agenttiginiń habarlaýynsha, resmı ókilder HAMAS maquldaǵan atysty toqtatý týraly usynysty zerttep jatyr.
HAMAS bekitken jospardyń «Izraıl usynǵan sheńber aıasyna» sáıkes kelmeıtini atap ótildi.
Sońǵy kúnderi kelissózge qatysqan sheneýnikterdiń málimdeýinshe, atysty toqtatý birneshe kezeńnen turady, onyń barysynda HAMAS Izraıl áskerleriniń Gazadan shyǵarylýyna aıyrbas retinde ustap otyrǵan kepilge alynǵan adamdardy bosatady.
Izraıl qorǵanys kúshteriniń Tel-Avıvtegi shtab-páteri mańyna jınalǵan narazy top bitimge kelýdi jáne kepilge alynǵandardy qaıtarýdy talap etti.
TsAHAL resmı ókili Danıel Hagarıdiń málimdeýinshe, Izraıl HAMAS-tyń atysty toqtatý týraly usynysyna jaýabyn, sondaı-aq kepilge alynǵandardy qaıtarýǵa ákeletin kez kelgen nusqany qarastyryp jatyr.
Sodan keıin Izraıl qorǵanys kúshteri Rafahtyń shyǵysyndaǵy HAMAS sodyrlarymen baılanysty nysandarǵa soqqy jasap jatqanyn habarlady.
Resmı málimdemege sáıkes, Izraıldiń áskerı kabıneti kepilge alynǵandardy bosatýdy jeńildetý jáne basqa da soǵys maqsattaryna jetý maqsatynda HAMAS-qa áskerı qysym kórsetý úshin Rafahtaǵy operatsııany jalǵastyrý jóninde sheshim qabyldaǵan.
Izraıl úkimeti óz adamdary Mysyrdaǵy araǵaıynmen kezdesetinin, biraq áskerılerge Rafahtaǵy operatsııany jalǵastyrýǵa buıryq bergenin málimdedi.
Izraıl Gazadaǵy bitimge kelý týraly usynysty qabyldamady jáne ony evreı memleketiniń negizgi talaptarynan «alshaq» dep atady.
«Áskerı kabınet Izraıldiń Rafahtaǵy operatsııasyn HAMAS-qa bizdiń kepilge alynǵandardy bosatý jáne basqa soǵys maqsatyna jetý úshin áskerı qysym kórsetýdi jalǵastyrý týraly sheshimdi biraýyzdan qabyldady» delingen Netanıahý keńsesiniń málimdemesinde.