HAMAS sodyrlary Qytaı men Taıland azamattaryn da urlap áketken

HAMAS sodyrlary urlap áketken Supernova mýzyka festıvali kórermenderiniń arasynda Qytaı azamaty bar. QazAqparat bul týraly BBC agenttigine silteme jasap habarlaıdy.

«Noa Beıjińde dúnıege kelgen. Ol — bizdiń qyzymyz, qaryndasymyz jáne dosymyz», — delingen Qytaıdyń Izraıldegi Elshiligi taratqan habarlamada.

Noany mototsıklge mingen bir top qarýly adam alyp ketkeni kórinip turǵan beınejazba qosa berilgen.

Dıplomatııalyq mıssııanyń habarlamasynda aıtylǵandaı, urlanǵan áıeldiń eki azamattyǵy bar — Qytaı Halyq Respýblıkasy men Izraıl.

Buǵan deıin erikti qutqarý jasaqtaryn biriktiretin ızraıldik ZAKA qoǵamdyq uıymy mýzykalyq festıval ótken jerden qaza tapqan 250-den astam adamnyń denesi tabylǵanyn habarlaǵan.

Izraıldiń ońtústigindegi shól dalada ótip jatqan jáne evreılerdiń Sýkkot merekesimen tuspa-tus keletin Supernova festıvaline shabýyl senbi kúni jasaldy.

Áleýmettik jelidegi kadrlar men kýágerlerdiń aıtýynsha, HAMAS sodyrlary kútpegen jerden paıda bolyp, kelýshilerdi atyp, kepilge ala bastaǵan. 

Taıland Syrtqy ister mınıstrliginiń habarlaýynsha, senbi kúni tańerteń HAMAS sodyrlarynyń Izraılge shabýyly bastaǵaly eldiń 12 azamaty qaza tapty, taǵy 11 adam urlanyp, segizi jaraqat aldy.

Taılandtyq jumysshy BBC Thai-ǵa senbi kúni ólimnen áreń aman qalǵanyn aıtty.

«Men júk kóliginiń astyna kirip kettim. HAMAS jaýyngerleri meni shyǵaryp alyp, tapanshany baǵyttady», — dedi ol.

Izraılde Taılandtyń 30 myńǵa jýyq azamaty bar, taǵy 5 myńdaıy Gaza sektorynda turady.