Hamas sodyrlary Izraılge zymyranmen shabýyl jasap, 20-dan astam adam mert boldy
Gaza sektoryndaǵy palestınalyq radıkaldar Izraıl aýmaǵyna zymyran atqylap, Izraıldiń ortalyǵy men ońtústiginde erekshe jaǵdaı engizildi. QazAqparat bul týraly euronews-ke silteme jasap habarlaıdy.
Izraıl senbi kúni Palestına tarapynyń jappaı zymyran atýyna jaýap retinde Gaza sektorynda áskerı operatsııa bastady. Ol «Temir qylyshtar» dep ataldy. Bul týraly armııanyń baspasóz qyzmetinen habarlady. Izraıldiń ondaǵan joıǵysh ushaǵy Hamastyń anklavtaǵy nysandaryna soqqy berýde.
Buǵan deıin Izraıldiń qorǵanys mınıstri Ioav Galant Gaza sektorynan senbi kúni tańerteń bastalǵan zymyrandyq shabýyldarǵa baılanysty Izraıldiń ortalyǵy men eldiń ońtústiginde «arnaıy qaýipsizdik jaǵdaıyn» engizýdi buıyrdy. Bul týraly eldiń Qorǵanys mınıstrliginiń baspasóz qyzmetinen habarlady.
«Jaǵdaıdy Izraıl qorǵanys qurylymdarynyń basshylyǵymen birge baǵalaýdan keıin Qorǵanys mınıstri Ioav Galant Gaza sektorynan 0-den 80 shaqyrymǵa deıingi radıýsta Izraıl tylynda «erekshe qaýipsizdik jaǵdaıyn» jarııalady. Bul statýs Izraıl qorǵanys kúshterine azamattarǵa qaýipsizdik nusqaýlaryn berýge jáne qajetti nysandardy jabýǵa múmkindik beredi», - delingen habarlamada.
Gaza sektorynan 80 km-ge deıingi radıýstaǵy aýmaq Gaza sektorymen tikeleı irgeles jatqan eldiń ońtústik aımaqtardan basqa, Izraıldiń ortalyq bóligin Tel-Avıvpen jáne onyń mańyndaǵy aýdandarmen, sondaı-aq Ierýsalım jáne Negev shóliniń birneshe aýdandary, sonyń ishinde Beer-Shevý qalasyn qamtıdy.
Buǵan deıin Izraıl armııasynyń baspasóz qyzmeti Palestına anklavy tarapynan Izraıl aýmaǵyna zymyran atylǵany týraly aqparatty rastady. Eldiń kóptegen eldi mekenderinde, sonyń ishinde Tel-Avıv aımaǵy men onyń tóńireginde dabyl úzdiksiz soǵyldy. Qalyptasqan jaǵdaı aıasynda Izraıl armııasy «soǵysqa ázirlik jaǵdaıyn» jarııalady, al eldiń Qorǵanys mınıstri Ioav Galant armııaǵa rezervısterdi alýdy maquldady.
Jergilikti BAQ-tyń habarlaýynsha, Izraıldegi atqylaýdan keıin qaza tapqandar sany 20 adamnan asty, 300-ge jýyq adam jaraqat alǵan.
Izraıl telearnasynyń habarlaýynsha, lańkester Izraıldiń ońtústigindegi birneshe kıbýtsyǵa kirip alyp, adamdardy tutqynǵa alyp jatyr.
Hamas «Izraıldiń birneshe eldi mekeni onyń tolyq baqylaýynda» ekenin málimdedi.
