HAMAS senbide kepilge alynǵan úsh ızraıldik tutqyndy bosatady

ASTANA. KAZINFORM – HAMAS qozǵalysy senbi, 15 aqpanda josparlanǵandaı kepilge alynǵan úsh ızraıldik azamat bosatylatynyn rastady, dep habarlaıdy Euronews.

Izraıl aqparat quraldarynyń habarlaýynsha, kepilge alynǵandardyń aty-jóni juma kúni belgili bolady.

Buǵan deıin Palestınanyń ıslamdyq qarsylasý qozǵalysy (HAMAS) Gaza sektoryndaǵy atysty toqtatý, sonyń ishinde tutqyndarmen almasý týraly kelisimdi oryndaýǵa nıetti ekenin rastady. 

Euronews-tiń habarlaýynsha, mámileniń birinshi kezeńi naýryzdyń basynda aıaqtalady, al ekinshi kezeń barysynda HAMAS uzaq merzimdi atysty toqtatý shartyna aıyrbas retinde kepilgen alynǵan qalǵan adamdardy bosatýy tıis, biraq onyń sharttary boıynsha naqty kelissózder áli júrgizilgen joq. HAMAS pen onyń odaqtastary kepilge alǵan 251 adamnyń 73-i áli bosatylmaǵan. Olardyń jartysy qaza tapqan bolýy múmkin.

Eske sala ketsek, dúısenbi kúni HAMAS toby senbige josparlanǵan ızraıldik kepilge alynǵandardy bosatýdy belgisiz ýaqytqa keıinge shegeretinin málimdegen bolatyn. 

Izraıl HAMAS-tyń tutqyndardy bosatýdy toqtatý týraly málimdemesine jaýap berdi. 

Izraıl premer-mınıstri Bınıamın Netanıahý eger HAMAS senbi kúni túske deıin kepilge alynǵandardy qaıtarmasa, Izraıl armııasy Gaza sektoryndaǵy áskerı operatsııalaryn qaıta bastaıtynyn málimdedi.