HAMAS senbi kúni bostandyqqa shyǵatyn kepildegi tórt ızraıldiktiń atyn atady

ASTANA. KAZINFORM – Tizimde Karına Arıev, Danıella Gılboa, Naama Levı jáne Lırı Albag bar. Olardyń barlyǵy áskerıler, dep habarlaıdy BBC.

Gaza sektoryndaǵy atysty toqtatý kelisimi aıasynda tórt ızraıldik kepil senbi kúni bosatylady. Onyń ornyna Izraıl 180 palestınalyq tutqyndy túrmeden shyǵarady.

Bul atysty toqtatý kelisimi kúshine engen ótken jeksenbiden bergi ekinshi almasý bolmaq. Birinshi almasýda Izraıl kepilge alynǵan úsh adamdy elge qaıtaryp, 90 palestınalyqty bosatty.

Atysty toqtatýǵa deıin Gazadaǵy shaıqas arada qysqa úzilispen bir jyldan astam ýaqyt jalǵasty. 2023 jyly 7 qazanda HAMAS Izraılge shabýyldaǵan bolatyn. Nátıjesinde 1200-ge jýyq ızraıldik kóz jumdy.

Taǵy 250-den astam adam kepilge alynyp, Gaza sektoryna jetkizilgen.

HAMAStyń baqylaýyndaǵy Gaza densaýlyq saqtaý mınıstrliginiń málimeti boıynsha, Izraıldiń áskerı operatsııasynda 47 200-den astam palestınalyq, negizinen beıbit turǵyndar qaza tapty.

Arıev, Gılboa, Levı jáne Albag Gaza sektorymen shekarada ornalasqan baqylaýshylar bólimshesiniń quramynda bolǵan. Tórteýi de 2023 jyly 7 qazanda HAMAS basyp alǵan «Nahal-Oz» áskerı bazasynda tutqynǵa alynǵan.

HAMAS taıaý arada kepilge alynǵan 26 adamǵa qatysty aqparat beredi dep josparlanǵan. Olar bitim sharttaryna sáıkes aldaǵy bes apta ishinde bosatylýy tıis. Olardyń arasynda Bıbas otbasynyń barlyq múshesi – ata-anasy men eki balasy bar, olardyń kenjesi Kfır kepilge alynǵan kezde 10 aılyq náreste bolǵan.

Izraıl bul joly bosatýdy josparlaǵandar arasynda kisi óltirgeni úshin sottalǵandar, onyń ishinde 15 jyldan astam túrmege otyrǵandar da bar.

Izraıl 7 qazandaǵy shabýylǵa qatysy bar adamdardy bosatýdan bas tartty.

Aıta keteıik, buǵan deıin Izraıl Lıvannan áskerin shyǵarý úshin kelisilgen 60 kúnnen bólek qosymsha 30 kún suraǵanyn jazǵan edik.