HAMAS pen FATH Beıjińde tatýlasý deklaratsııasyna qol qoıdy
BEIJІŃ. KAZINFORM — HAMAS pen FATH alaýyzdyqty toqtatý men birlikti nyǵaıtýǵa baǵyttalǵan «Beıjiń deklaratsııasyna» qol qoıdy.
Qytaı Syrtqy ister mınıstrligi 23 shildede taratqan habarǵa qaraǵanda, Qytaı Syrtqy ister mınıstri Van Idiń tóraǵalyǵymen 14 palestınalyq fraktsııa ókilderi Beıjińde jınalys ótkizip, «Palestınanyń bólinýin toqtatý jáne ulttyq birlikti nyǵaıtý týraly Beıjiń deklaratsııasyna» qol qoıǵan.
«Bul — Palestınany azat etý jolyndaǵy mańyzdy jáne tarıhı sát», — dedi Van I.
Van I Qytaıdyń búkil taraptardyń bitimge kelý jolyndaǵy talpynysyn joǵary baǵalaıtynyn jáne Beıjiń dıalogynyń sátti ótkenin sóz etip, Beıjiń deklaratsııasyna qol qoıǵandardy quttyqtady.
Van I sondaı-aq deklaratsııaǵa qol qoıý arqyly qos tarap eleýli kelispeýshilikti sheshý jolynda jańa qadam jasaǵanyn aıtty.
Onyń aıtýynsha, Beıjiń deklaratsııasynda «Palestınany azat etý uıymy» — búkil Palestına halqynyń jalǵyz zańdy ókili ekeni naqtylanǵan.
HAMAS pen FATH 17 jylǵa sozylǵan saıası kelispeýshiligin sheshý úshin osy jyldyń sáýir aıynda Beıjińde konsýltatsııa ótkizgen.
Sońǵy jyldary Qytaı uzaq ýaqyt boıy AQSh-tyń ústemdiginde bolǵan Taıaý Shyǵysta óziniń dıplomatııalyq yqpalyn belsendi túrde kórsetip keledi.
Dıplomatııalyq qarym-qatynasy uzaq jyldar boıy úzilgen Iran men Saýd Arabııasy arasyndaǵy ótken jylǵy bitimgershilik kelisiminen keıin bıyl olar Palestına ishilik bitimgershilikke járdemdesý jáne aımaqtaǵy bitimgershilik deldal pozıtsııasyn ıelený úshin talpynysyn kúsheıtti.
