HAMAS pen deldaldar arasyndaǵy kelissózdiń birinshi raýndy oń nátıjemen aıaqtaldy
ASTANA.KAZINFORM - Palestınalyq top pen Gaza sektoryndaǵy jaǵdaı boıynsha deldaldar arasyndaǵy kelissózder asqan saqtyqpen bastaldy, dep habarlaıdy Kazinform agenttiginiń menshikti tilshisi.
Seısenbi kúni tańerteń Mysyrda ótken HAMAS pen deldaldar arasyndaǵy Gaza boıynsha kelissózderdiń birinshi raýndy «oń nátıjemen» aıaqtaldy, dep habarlady mysyrlyq BAQ. Taraptar kelissózder raýndyn jalǵastyrý boıynsha jol kartasyn ázirledi. Al-Qahera News-tiń habarlaýynsha, kelissózderdiń birinshi kúninde tutqyn almasý, atysty toqtatý jáne Gaza sektoryna gýmanıtarlyq kómek jetkizý máselesi talqylandy.
HAMAS pen deldaldar arasyndaǵy kelissózder seısenbi kúni Sharm-el-Sheıh kýrorttyq qalasynda jalǵasady. Óıtkeni munda Izraıl delegatsııasy keledi.
Izraıl Gaza sektoryna shabýylyn toqtatqan joq. Seısenbi kúni tańnan beri anklavta kem degende 10 palestınalyq, sonyń ishinde gýmanıtarlyq kómek suraǵandar qaza tapty.
AQSh prezıdenti Donald Tramp Izraıldi bombalaýdy toqtatýǵa shaqyrǵaly beri Gaza sektorynda keminde 104 adam ızraıldik kúshterdiń qolynan qaza tapty. HAMAS delegatsııasy deldaldarǵa Izraıldiń Gaza sektoryn bombalaýyn jalǵastyrýy tutqyndardy bosatý kelissózderine qıyndyq týdyratynyn aıtty, dep habarlaıdy Al Jazeera Arabic.
Izraıl men HAMAS AQSh prezıdenti Donald Tramptyń tutqyn almasý jáne uzaq merzimdi atysty toqtatý týraly usynysynyń egjeı-tegjeıi týraly janama kelissózder júrgizýi múmkin.
AQSh prezıdenti Donald Tramp dúısenbi kúni Sopaq keńsede jýrnalıster aldynda sóılegen sózinde Gaza sektory boıynsha kelisimge jaqyn arada qol jetkiziletinine senetinin aıtyp, eki jylǵa sozylǵan joıqyn soǵysty toqtatý jolynda «úlken progreske» qol jetkizilgenin aıtty.
- Bizde mámile jasaýǵa jaqsy múmkindik bar, - dedi Tramp. Biraq onyń áli de «sheshilmegen tustary» bar ekenin atap ótti.
Amerıka prezıdenti HAMAS-tyń ótken aptadaǵy málimdemesin qoldady. Onda palestınalyq top onyń Gaza sektory týraly usynysynyń keıbir bólikterin qabyldady, sonymen birge anklavty soǵystan keıingi basqarýǵa qatysty basqa tarmaqtar boıynsha odan ári kelissózder júrgizý qajettigin málimdedi.
Buǵan deıin arab dıplomaty The Times of Israel basylymyna kelisimge kelý birneshe kúnge, múmkin odan da uzaqqa sozylatynyn aıtqan.
Sondaı-aq, HAMAS-tyń Gazada kepilge alynǵan ızraıldik qurbandardyń máıitin jınaýǵa kiriskenin habarlaǵan edik.