HAMAS Palestına memleketi qurylmaıynsha qarý tapsyrýdan bas tartty

ASTANA. KAZINFORM — HAMAS toby palestınalyqtardyń ulttyq quqyqtary tolyq qalpyna keltirilmeıinshe, qarý-jaraqty tapsyrýdan bas tartatynyn málimdedi, dep jazdy DW.

Buǵan deıin Germanııanyń syrtqy ister mınıstri Gaza sektoryndaǵy beıbitshilik úshin HAMAS-ty qarý tapsyrýǵa shaqyrǵan bolatyn.

Terrorıstik dep tanylǵan HAMAS uıymy Gaza sektoryndaǵy qaqtyǵystardy toqtatý maqsatynda jasalǵan qarýdy tapsyrý týraly úndeýlerdi qabyldamady. 2 tamyz, senbi kúni top táýelsiz palestınalyq memleket qurylmaıynsha qarýdan bas tartpaıtynyn málimdedi.

— Urystar tek ulttyq quqyqtarymyz tolyq qalpyna keltirilgende ǵana, eń aldymen Ierýsalımdi astana etken egemen, táýelsiz palestınalyq memleket qurylǵanda toqtatylýy múmkin, — delingen HAMAS taratqan málimdemede.

Germanııa SІM basshysy HAMAS-ty qarýdy tastaýǵa shaqyrdy

Buǵan deıin Germanııanyń syrtqy ister mınıstri Iohann Vadefýl HAMAS terrorısteri qarýdy tastap, tutqyndardy bosatyp, Gazadaǵy bılikten bas tartsa, soǵys aıaqtalady degen málimdeme jasaǵan bolatyn.

— Germanııa Izraıldi qoldaýdy jalǵastyra beredi jáne HAMAS aqyry nemis azamattaryn qosa alǵanda, barlyq tutqyndardy bosatyp, qarýyn tapsyryp, palestınalyq aımaqtardaǵy saıası yqpalynan bas tartýy úshin jumys isteıdi. Bul qozǵalys endi Izraılge qaýip tóndirmeýi kerek, — dedi ol.

Mınıstr HAMAS-ty «berilýden jáne bul soǵysty toqtatýdan bas tartty» dep aıyptady.

Aıta keteıik, álemniń kóptegen elderi Palestına memleketin moıyndaı bastady. Qyrkúıek aıynda Frantsııa da osyndaı sheshim qabyldaýy múmkin. Bul el basqa memlekettermen birge álem qaýymdastyǵyn da osy qadamǵa shaqyrǵan bolatyn.