HAMAS qozǵalysy AQSh ókiliniń synynan keıin bitimge beıildiligin rastady
ASTANA. KAZINFORM — Juma kúni tańerteń HAMAS qozǵalysy atysty toqtatý jónindegi kelissózderge beıildiligin rastaıtynyn málim etti, dep habarlaıdy Sınhýa.
Bul málimdeme Taıaý Shyǵys boıynsha AQSh-tyń arnaıy ókili Stıv Ýıtkofftyń HAMAS-tyń kelissózderdegi nıetine qatysty synynan keıin jarııa etildi.
BAQ-qa arnalǵan málimdemesinde HAMAS qozǵalysy arnaıy ókildiń pikirlerine «tańdanǵanyn» bildirip, qozǵalystyń dıplomatııalyq úderistegi qatysýy Gaza sektoryndaǵy atysty toqtatý jóninde kelisimge qol jetkizýge baǵyttalǵanyn atap ótti.
Budan bólek HAMAS Mysyr, Qatar jáne AQSh syndy araaǵaıyn elderden túsken usynystar men pikirlerge oń kózqaras tanytqanyn aıtty. Sonymen qatar, HAMAS kelissózderdi jalǵastyrýǵa ashyq ekenin jáne bekitilgen deldaldyq mehanızm aıasynda jumys isteýge beıildi ekenin jetkizdi.
Stıv Ýıtkoff beısenbi kúni AQSh Gaza sektoryndaǵy atysty toqtatýdyń «balama joldaryn» qarastyratynyn málimdedi. Sondaı-aq, ol AQSh-tyń kelissózder júrgizýshi tobyn Qatardan elge keri qaıtaryp jatqanyn habarlady. Sebebi, onyń aıtýynsha, HAMAS qozǵalysynyń sońǵy jaýaby «ózimshil» sıpatta bolǵan.
— HAMAS qozǵalysynyń sońǵy jaýaby Gaza sektorynda atysty toqtatýǵa degen nıettiń joq ekenin anyq kórsetti. Osyǵan baılanysty biz Dohadaǵy komandamyzdy konsýltatsııalar úshin elge qaıtaramyz, — dep jazdy ol X áleýmettik jelisinde.
Budan buryn Izraıl men HAMAS-qa tatýlasý boıynsha jańa usynys jasalǵany málim boldy.