HAMAS kóshbasshysynyń orynbasary Lıvandaǵy jarylys kezinde qaza tapty

HAMAS kóshbasshysynyń orynbasary Saleh ál-Arýrı Lıvan astanasy Beırýttiń ońtústiginde bolǵan jarylystan qaza tapty. HAMAS onyń ólimin rastady. Kazinform agenttigi bul týraly VVS-ge silteme jasap habarlaıdy. 

Ál-Arýrı HAMAS saıası bıýrosy basshysynyń orynbasary bolǵan, sonymen birge ol toptyń áskerı is-áreketine tereń aralasty.

Lıvan memlekettik BAQ habarlaýynsha, jarylys Lıvan astanasy mańynda, Danııadaǵy HAMAS keńsesiniń janynda bolǵan.

HAMAS-tyń habarlaýynsha, jarylystan onyń taǵy eki komandıri men basqa tórt múshesi qaza tapqan.

Uıymnyń málimdemesinde “Ál-Kassam brıgadalarynyń” (qozǵalystyń áskerı qanaty) óltirilgen eki komandıriniń aty atalǵan: Samır Fendı jáne Azzam ál-Akra.

Lıvan premer-mınıstri Nadjıb Mıkatı Beırýt mańyndaǵy jarylysty qylmys dep atady. Onyń aıtýynsha, bul «Lıvandy Izraılmen konfrontatsııanyń jańa satysyna tartýdy kózdeıtin» qylmys.

Izraıl jarylysqa qatysy baryn resmı túrde moıyndaǵan joq. El premer-mınıstriniń aǵa keńesshisi Mark Regev bul jaǵdaıdy erekshe atap ótti.

«Muny kim istese de, bul Lıvan memleketine jasalǵan shabýyl emes ekenin túsiný kerek. Muny kim istese de, ol HAMAS basshylyǵyna hırýrgııalyq soqqy berdi», - dedi Regev amerıkalyq MSNBC telearnasyna bergen suhbatynda.

TsAHAL ókili kontr-admıral Danıel Hagarı Izraıl armııasynyń «kez kelgen stsenarııge joǵary daıyndyq jaǵdaıynda» ekenin aıtty.