HAMAS Qyzyl Krestke ızraıldik tutqyndardyń úshinshi tobyn tapsyrdy

Palestınanyń «Islam qarsylasý qozǵalysynyń» (HAMAS) «Izz ed-Dın ál-Qassam brıgadalary» Izraılmen ýaqytsha jasalǵan bitimniń úshinshi kúninde tutqynǵa alynǵan ızraıldik azamattardyń úshinshi tobyn Qyzyl Krest uıymyna tapsyrdy. Bul týraly toptyń jeksenbi kúni jarııalaǵan málimdemesinde aıtylǵan. Kazinform bul týraly Sınhýa aqparat agenttigine silteme jasap habarlaıdy.

Málimdemede: «Gýmanıtarlyq bitim aıasynda jáne almasýdyń úshinshi kezeńinde biz 13 ızraıldik, 3 taılandtyq jáne 1 reseılik tutqyndy Qyzyl Krest uıymyna tapsyrdyq», – delingen.

Onymen bir mezgilde Izraıl qorǵanys kúshteri (TsAHAL) jasaǵan málimdemede Qyzyl Krest uıymyna tapsyrylǵandar arasynda tutqynǵa alynǵan 14 ızraıldik jáne 3 sheteldik azamat bar ekeni aıtylǵan.

Eske salaıyq, Palestınalyq HAMAS toby 7 qazan kúni Izraılge shabýyl jasap, mýzykalyq festıval ótip jatqan jerden kóptegen adamdy kúshtep áketken bolatyn. Tutqynǵa alynǵandar arasynda Qytaı men Taıland azamattary da bar ekeni aıtyldy. Izraılń deregine súıensek, HAMAS sol kúni Gaza sektoryna 203 adamdy kepilge áketti.

22 qarashada Izraıl men HAMAS tutqyndardy bosatýǵa, soǵysty ýaqytsha toqtatýǵa keliskenin jazdyq.

Bul bitim 24 qarashada kúshine engeni jarııalandy. Kelisimge sáıkes, oq atýǵa úzilis tórt kúnge sozylady.

Tutqyndardyń alǵashqy legi 24 qarashada bosatyla bastady. Olar Taılandtyń 12 azamaty ekeni aıtyldy.

Keıinnen HAMAS taǵy 13 ızraıldikke erkine qoıa berdi. Oǵan jaýap retinde Izraıl 39 palestınalyq tutqyndy jiberdi. Sonymen qatar Taılandtyń taǵy tórt azamaty bosatyldy.