HAMAS kelesi bosatylatyn kepilge alynǵandardyń esimderin jarııalady

ASTANA.KAZINFORM - Izraıl HAMAS-tan 1 aqpan kúni Gaza sektorynda tutqynnan bosatylýy tıis úsh adamnyń tizimin alǵanyn málimdedi.

Palestınalyq HAMAS juma kúni kepilge alynǵan úsh adamdy bosatatynyn málimdedi. ıArden Bıbas, Kıt Sıgel jáne Ofer Kalderon senbi kúni tabystalady, dep habarlady HAMAS ókili Abý Obeıda óziniń Telegram arnasyndaǵy habarlamasynda.

ıArden Bıbas - 2023 jyly 7 qazanda Izraılge jasalǵan shabýyl kezinde kepilge alynǵan eń kishkentaı tutqynnyń ákesi. Urlanǵan kezde onyń uly Kfır nebári toǵyz aılyq bolsa, ekinshi uly Arıel tórt jasta edi. Eki uldyń da, olarmen birge tutqynǵa túsken anasy Shırıdiń de taǵdyry týraly eshteńe habarlanǵan joq.

2023 jyldyń sońynda HAMAS olardyń Izraıl shabýylynan qaza tapqanyn málimdedi. Izraıl olardyń ólimin resmı túrde rastamady, biraq olardyń taǵdyryna «qatty alańdaýshylyq» bildirdi.

65 jastaǵy AQSh-Izraıl azamaty Kıt Sıgel áıeli Avıvamen birge kepilge alyndy. Onyń áıeli 2023 jyldyń qarashasyndaǵy alǵashqy tutqyn aıyrbastaý kezinde bosatylǵan.

54 jastaǵy Ofer Kalderon - Izraıl men Frantsııa azamaty. Ol balalary Erez jáne Saharmen birge tutqyndalǵan. Eki balasy 2023 jyldyń qarashasynda bosatyldy.

Izraıl bıligi kepilge alynǵandardyń otbasylaryna habarlanǵanyn jáne Izraıl HAMAS tizimin qabyldap jatqanyn habarlady.

Onyń ornyna senbi kúni 90 palestınalyq tutqyn Izraıl túrmelerinen bosatylady. HAMAS olardyń quramyna Izraılde ómir boıyna sottalǵan toǵyz tutqyndy qosatynyn aıtty.

Búginde Gaza sektorynda 79 kepilge alynǵan adam tutqynda.

HAMAS-pen kelisimniń birinshi kezeńi aıasynda barlyǵy 33 kepilge alynǵan adam Izraılge tapsyrylady. Olardyń 25-i kelisim jasalǵan kezde tiri bolǵan. Izraıl óz kezeginde 735 tutqyndy, onyń ishinde adam óltirý jáne terrorızm úshin ómir boıyna bas bostandyǵynan aıyrylǵandardy bosatýǵa kelisti.

Beısenbi, 30 qańtarda Gaza sektorynda barymtadaǵy segiz adam – úsh Izraıl azamaty jáne bes Taıland azamaty bosatyldy.