HAMAS qarýyn saıası partııa mártebesine aıyrbastaıdy

ASTANA. KAZINFORM - Palestınalyq HAMAS qozǵalysy AQSh ákimshiligimen saıası moıyndalǵan jaǵdaıda qarýsyzdanatyny týraly kelisimge keldi dep habarlaıdy Kazinform agenttigi Sky News Arabia-ǵa silteme jasap.

Kelisimde HAMAS-ty saıası partııa retinde moıyndaý úshin Gaza sektoryndaǵy qarý-jaraq pen jerasty týnnelderiniń kartasyn berý qarastyrylǵan.

Kelisimge sondaı-aq Gaza sektorynan ketýdi qalaıtyn qozǵalystyń saıası jáne áskerı kóshbasshylaryna AQSh tarapynan qýdalaýsyz ketý múmkindigi de kiredi. Sonymen qatar, Vashıngton Izraıl men AQSh-tyń qaýipsizdik ruqsatyn alǵan jaǵdaıda, HAMAS-tyń keıbir polıtsııa qyzmetkerleri men burynǵy sheneýnikterin jańa Gaza ákimshiligine biriktirýge keliskeni habarlanǵan.

Sondaı-aq, Palestına ulttyq ákimshiligi mundaı kelisimder soǵys qımyldaryn toqtatýǵa jáne Gaza sektoryndaǵy qalpyna keltirý protsesin jedeldetýge ákelse, olarǵa qarsy emes ekeni habarlanǵan. Alaıda, Izraıl usynylǵan kelisimniń birneshe tarmaǵyna, eń bastysy HAMAS-tyń saıası kúsh retinde ómir súrýine qarsy boldy.

Esterińizge sala keteıik, beısenbi kúni Davostaǵy Dúnıejúzilik ekonomıkalyq forým aıasynda 19 eldiń ókili Gazadaǵy beıbitshilik protsesiniń bóligi retinde qurylǵan Beıbitshilik keńesiniń jarǵysyna qol qoıdy. AQSh prezıdenti Donald Tramp bul qurylymǵa aqyrynda 50-den astam el kiretinin málimdedi.

Buǵan deıin Vashıngton Gaza sektoryndaǵy qaqtyǵysty toqtatý jáne Palestına aýmaǵy úshin jańa basqarý modelin qurý josparynyń ekinshi kezeńine kóshetinin jarııalaǵan bolatyn.