HAMAS Izraılge taǵy eki tutqynnyń denesin tapsyrady
ASTANA. KAZINFORM — Izraıl men HAMAS qozǵalysy arasyndaǵy bitim týraly kelisimniń oryndalýymen qatar, qaza tapqan tutqyndardyń máıitteri qaıtarylyp jatyr, dep habarlaıdy Kazinform agenttiginiń menshikti tilshisi.
HAMAS-tyń qarýly qanaty — «Izz ad-Dın ál-Kassam brıgadalary» seısenbi kúni jergilikti ýaqyt boıynsha saǵat 21:00-de (Astana ýaqytymen 23:00-de) Izraıl jaǵyna Gaza sektorynda qaza tapqan eki tutqynnyń denesin tapsyratynyn málimdedi.
Uıym málimdemesinde máıitterdiń seısenbi kúni tabylǵanyn, alaıda marqumdardyń kim ekeni naqty anyqtalmaǵanyn atap ótken.
10 qazannan bastap kúshine engen bitim rejımi aıasynda HAMAS Izraılge 28 tutqynnyń ishinde 13 máıitti qaıtardy.
Dúısenbi kúni Qyzyl Kresttiń Halyqaralyq Komıteti Gaza sektorynan 41 jastaǵy ızraıldik ofıtser Tal Haımıdiń denesin alǵan.
Buǵan deıin aman qalǵan 20 tutqyn AQSh-tyń araǵaıyndyǵymen jasalǵan kelisimge sáıkes bir kúnde bosatylǵan edi.
Saıası bıýrosy múshesi Halıl ál-Haııa Al Qahira Al Akhbariya telearnasyna bergen suhbatynda HAMAS qalǵan 15 tutqynnyń denesin qaıtarýǵa daıyn ekenin aıtty. Biraq ol úshin HAMAS-qa kóbirek ýaqyt pen aýyr tehnıka qajet ekeni aıtylǵan.
— Biz eshkimdi kúshtep ustap otyrǵymyz kelmeıdi. Qaza tapqandardyń deneleri týǵan-týystaryna qaıtarylsyn, al óz jaýyngerlerimiz laıyqty túrde jerlenýge tıis, — dedi ol.
Onyń aıtýynsha, qalǵan máıitterdiń keıbiri qıraǵan ǵımarattardyń astynda qalýy múmkin, bul izdeý jumystaryn qıyndatyp otyr.
Al Izraıl tarapy HAMAS-ty shyndyqty jasyryp otyr dep aıyptap, uıym marqumdardyń denelerin tez arada qaıtarýǵa qaýqarly ekenin málimdedi.
15 hostages are still held captive in Gaza.
— Bring Them Home Now (@bringhomenow) October 21, 2025
We won’t stop. We won’t rest until they’re all home.
Until the last hostage 🎗️ pic.twitter.com/86ATqlAaWv
Sondaı-aq, HAMAS ókili AQSh pen araǵaıyn elderden alynǵan kepildikter «Gazadaǵy soǵystyń is júzinde aıaqtalǵanyn bildiredi» dep málimdep, qozǵalys gýmanıtarlyq kómek kólemin arttyrýdy talap etetinin jetkizdi.
Al Jazeera málimetinshe, 10 qazanda jasalǵan bitimge qaramastan, Izraıl áskeriniń Gaza sektoryna shabýyldary jalǵasyp jatyr. Sońǵy táýlikte aýrýhanalarǵa 13 adamnyń denesi jetkizilgen.
Budan buryn habarlanǵandaı, Izraıl shabýyly kezinde Gazada bir táýlikte 40-tan astam palestınalyq qaza tapty.