HAMAS Izraılge taǵy bir tutqynnyń denesin qaıtardy

ASTANA. KAZINFORM – HAMAS qozǵalysy Izraılge taǵy bir tutqynnyń denesin qaıtardy, dep habarlaıdy DW. Kelisim boıynsha qaza tapqan 20 tutqynnyń súıegi 16 qazanǵa deıin berilýi tıis bolǵan.

AFP agenttiginiń habarlaýynsha, 17 qazan kúni keshke HAMAS taǵy bir marqum tutqynnyń denesin halyqaralyq Qyzyl Krest komıteti ókilderi arqyly Izraıl armııasyna (TsAHAL) tapsyrdy. Buǵan deıin osylaı tórt adamnyń súıegi qaıtarylǵan bolatyn.

Bitim shartyna sáıkes, Izraıl áskeri atysty toqtatyp, HAMAS 20 aman qalǵan tutqyndy jáne 28 qaza tapqan tutqynnyń denesin qaıtarýǵa mindettelgen. Tiri ızraıldikter 13 qazanda qaıtarylǵanymen, 28 adamnyń denesinen ázirge tek toǵyzy ǵana Izraılge jetkizilgen. HAMAS ókilderi qalǵan súıekterdi shyǵarý úshin «arnaıy jabdyq qajet» ekenin aıtyp, ózderiniń kelisim sharttaryn oryndaǵandaryn alǵa tartýda.

Izraıl men AQSh áskerı áreketti qaıta bastaıtynyn eskertti

Osy jaǵdaıǵa baılanysty Izraıldiń qorǵanys mınıstri Israel Kats HAMAS kelisim talaptaryn oryndamasa, el áskeriniń AQSh-pen birlesip áskerı áreketterdi qaıta bastaıtynyn málimdedi.

Al AQSh prezıdenti Donald Tramp bul múmkindikti joqqa shyǵarmady. Ol Izraıl premer-mınıstri Bınıamın Netanıahýǵa Gazadaǵy áskerı qımyldardy qaıta jalǵastyrýǵa ruqsat berý máselesin qarastyratynyn aıtty.

Gazadaǵy bitim týraly deklaratsııa

13 qazanda Egıpettiń Sharm-esh-Sheıh qalasynda ótken halyqaralyq beıbitshilik sammıtinde Gaza sektorynda atysty toqtatý týraly deklaratsııaǵa qol qoıyldy.

Qujatqa Egıpet, Qatar, Túrkııa jáne AQSh memleketteri qol qoıyp, Izraıl men HAMAS arasyndaǵy kelisimniń kepilgerleri bolýǵa kelisti. Bul bitim soǵysty toqtatyp, Taıaý Shyǵystaǵy jaǵdaıdy turaqtandyrýǵa baǵyttalǵan.

AQSh prezıdenti Donald Tramp bul kúndi «Búkil álem men Taıaý Shyǵys úshin tarıhı sát» dep atap ótti.