HAMAS Izraılge kepilge alynǵandarǵa tıesili emes taǵy 3 adamnyń máıitin tapsyrdy

ASTANA. KAZINFORM – HAMAS Qyzyl Krest arqyly Izraılge taǵy úsh adamnyń súıegin qaıtardy. Alaıda bul máıitter joǵalǵan tutqyndarǵa tıesili emes, dep habarlaıdy Kazinform agenttigi Euronews-ke silteme jasap.

Qyzyl Kresttiń málimetinshe, juma kúni keshkisin Izraılge úsh belgisiz adamnyń súıegi tabystalǵan. Sot-medıtsınalyq saraptama olardyń tutqyndarǵa qatysy joq ekenin rastady.

Bul oqıǵa Izraıldiń ótken jumada 30 palestındiktiń súıegin Gaza bıligine qaıtarýynan keıin boldy. Almasý úderisi HAMAS tarapynan eki tutqynnyń súıegi berilgen soń jalǵasyn tapqan. Bul – Izraıl men HAMAS arasyndaǵy atysty toqtatý jónindegi kelisim baıaý bolsa da ilgerilep kele jatqanyn kórsetedi. 

Degenmen almasý Gazaǵa jasalǵan áýe soqqylarynyń aıasynda ótti. Izraıl tarapynyń dereginshe, soqqylar kezinde 100-den astam palestındik qaza tapqan. Áýe shabýyldary ızraıldik bir sarbazdyń Gazadaǵy qaqtyǵystar barysynda mert bolýynan keıin jasalǵan.

Qaza bolǵandardyń denesi Qyzyl Krestke berilip, uıym taraptardyń arasyndaǵy deldal retinde áreket etken. Palestındik tarap súıekterdiń qabyldanǵanyn Han-ıÝnıste ornalasqan Naser aýrýhanasynyń dárigeri rastaǵan. Qazir medıtsınalyq qyzmetkerler olardy anyqtaý jumystaryn júrgizip jatyr.

Basylym dereginshe, bitim bastalǵannan beri HAMAS barlyǵy 20 tutqyndy tirideı, al 17 adamnyń súıegin Izraılge qaıtarǵan. Taǵy 11 adamnyń denesi Gaza aýmaǵynda qalyp otyr. Olar da AQSh prezıdenti Donald Tramptyń bastamasymen ázirlengen kelisim sheńberinde qaıtarylýy tıis.

Eske salsaq, buǵan deıin HAMAS Izraılge eki tutqynnyń máıitin qaıtarǵanyn jazǵanbyz.