HAMAS Izraılge kepilge alynǵan tórt adamnyń denesin tapsyrdy

ASTANA. KAZINFORM – Josparda atysty toqtatý kelisimi aıasynda 28 adamnyń denesin berý qarastyrylǵan, dep habarlaıdy VVS. 

HAMAS ókilderi keıbir máıitterdi alý qıynǵa soǵatynyn, óıtkeni kepilge alynǵandar Gaza sektorynyń ártúrli aımaqtarynda túrli toptardyń qolynda bolyp qaıtys bolǵanyn málimdedi. 

Budan basqa, sodyrlar keıbir adamdardyń deneleri soǵys kezinde qıraǵan ǵımarattar úıindileri astynda qalýy múmkin ekenin, olardy alyp shyǵý úshin aýyr tehnıka qajet dep málimdedi.

Izraıl qorǵanys kúshteri (TsAHAL) qaza bolǵan kepilge alynǵandardyń deneleri salynǵan tórt tabyttyń áskerı qyzmetkerlerdiń birge erip júrýimen Izraıl shekarasynan ótkenin jáne sáıkestendirý júrgiziletin Sot medıtsına ınstıtýtyna jetkizilgenin habarlady. Marqumdardyń otbasylarymen birge TsAHAL ókilderi erip júr. 

Times of Israel jazýynsha, HAMAS sársenbi kúni kepilge alynǵan taǵy tórt adamnyń denesin qaıtaratynyn málimdedi. 

Máıitter Izraıl Palestına tobynan ólgen adamdardyń súıekterin tapsyrý jónindegi mindettemelerin oryndaýdy talap etip, Rafah shekara beketin jabyq kúıde ustaıtynyn jáne Gazaǵa gýmanıtarlyq kómek jetkizilimin azaıtatynyn jarııalaǵannan keıin qaıtaryldy. Buǵan deıin Izraıl premer-mınıstri Bınıamın Netanıahý qalǵan kepilge alynǵandar týraly habardy «birneshe saǵattyń ishinde» kútetinin málimdegen. 

- Jaqynda birneshe saǵat ishinde taǵy birneshe qaza bolǵan kepilge alynǵandardyń qaıtarylýy týraly habar alamyz. Biraq biz olardyń barlyǵyn qaıtarmaqpyz, - dedi Netanıahý dúısenbi kúni bosatylǵan tutqyndar jatqan aýrýhanaǵa barǵan kezde.

Buǵan deıin AQSh prezıdenti Donald Tramp ta HAMAS-tan barlyq ólgen ızraıldik kepilge alynǵandardyń máıitterin qaıtarýdy talap etip, onyń Gazadaǵy beıbitshilik josparynyń kelesi kezeńi bastalǵanyn málimdegen. 

- Barlyq 20 tqtqyn oraldy jáne kútilgendeı ózderin jaqsy sezinip júr. Moıynymyzdan úlken júk tústi, biraq jumys áli aıaqtalǵan joq. Qaza bolǵandar ýáde etilgendeı qaıtarylmady. Ekinshi kezeń dál qazir bastalady! – dep jazdy Tramp Mysyrda beıbit jolmen retteý týraly deklaratsııaǵa qol qoıylǵan kúnniń erteńine óziniń Truth Social áleýmettik jelidegi paraqshasynda.

Keshe Mysyrdyń Sharm-el-Sheıh qalasynda qol qoıylǵan atysty toqtatý kelisiminiń egjeı-tegjeıi belgisiz bolyp qalyp otyr. Tramptyń beıbitshilik josparynyń birinshi fazasy negizinen ızraıldik kepilge alynǵandar men palestınalyq tutqyndardy aıyrbastaýǵa, sondaı-aq Gazadan áskerdi ishinara shyǵarýǵa baǵyttalǵan.

VVS jazýynsha, kelisimniń kelesi kezeńderi boıynsha kelissóz barysynda birqatar daýly máseleler týyndaýy múmkin, sonyń ishinde HAMAS-ty qarýyn tastaýǵa shaqyrý – top bul múmkindikti qabyldamaı otyr. 

Seısenbi kúni Tramp Aq úıde eger sodyrlar buny óz erkimen jasaýdan bas tartsa, HAMAS-ty qarýsyzdandyrýǵa ýáde berip, qajet bolǵan jaǵdaıda bul maqsatqa kúshpen jetýge bolatynyn qosyp ótti. 

- Eger olar qarýyn tastamasa, biz olardy qarýsyzdandyramyz. Jáne bul tez jáne múmkin kúsh qoldaný arqyly bolady, - dep málimdedi amerıkalyq kóshbasshy Aq úıde Argentına prezıdenti Haver Mıleımen kezdesýi kezinde.

Buǵan deıin AQSh prezıdenti Donald Tramp pen Mysyr, Qatar men Túrkııa basshylary Gazada atysty toqtatý týraly kelisimderdi bekitetin qujatqa qol qoıdy. Qol qoıý rásimi Qyzyl teńiz jaǵalaýynda Mysyrdyń kýrortty Sharm-esh-Sheıh qalasynda 13 qazan kúni bastalǵan «Beıbitshilik - 2025» halyqaralyq sammıtiniń aıasynda ótti.