HAMAS Izraılge qaraı úsh zymyran ushyrdy

ASTANA. KAZINFORM —  Izraıldiń Gaza sektoryndaǵy áskerı operatsııasyn qaıta bastaǵannan keıin úsh kún ishinde jergilikti bıliktiń málimetinshe, shamamen 600 adam qaza tapqan, dep habarlaıdy BBC.

Palestınalyq taraptyń málimdeýinshe, qaza tapqandardyń basym bóligi beıbit turǵyndar, olardyń ishinde áıelder men balalar bar.

— Izraıl HAMAS-qa qarsy dálme-dál soqqylar jasaǵanyn aıtyp, áskerı operatsııany kúsheıtýge ýáde berdi. Negizgi maqsaty – tutqyndardy qaıtarý jáne radıkaldy topty tolyq joıý, — dep habarlaıdy BBC.

Jaýap retinde HAMAS beısenbi kúni Izraılge qaraı úsh zymyran ushyrdy, alaıda olardyń barlyǵy Izraıldiń áýe qorǵanys júıesi arqyly joıyldy.

Eske sala keteıik, HAMAS delegatsııasy kelissózder úshin Kaırge jol tartty. Buǵan deıin Izraıl Gaza sektorynda qurlyq operatsııasyn bastaǵanyn jarııalaǵan edi.