HAMAS Izraılge eki tutqynnyń máıitin qaıtardy
ASTANA. KAZINFORM – Palestınalyq HAMAS qozǵalysy Izraılge eki qaza tapqan tutqynnyń — 84 jastaǵy Amıram Kýper men 25 jastaǵy Sahar Barýhtyń máıitin tapsyrdy.
Izraıl bıligi birneshe saǵatqa sozylǵan sáıkestendirý rásiminen keıin olardyń jeke basyn rastady.
Izraıl qorǵanys armııasynyń málimetinshe, Kýper 2023 jylǵy 7 qazanda Nır-Oz kıbýtsynan urlanyp, 2024 jylǵy aqpanda tutqynda qaza tapqan dep boljanady. Al Barýh Beerı kıbýtsynda HAMAS jasaqtary tarapynan tutqynǵa alynǵan jáne 2023 jylǵy jeltoqsanda tutqyndardy bosatý operatsııasy kezinde kóz jumǵan.
Qorǵanys vedomstvosy olardyń ólimine qatysty naqty qorytyndy Tel-Avıvtegi Abý-Kabır sot-medıtsına ınstıtýtynda saraptama aıaqtalǵannan keıin shyǵatynyn málimdedi.
Bul sońǵy toǵyz kún ishinde HAMAS Izraılge qaza tapqan tutqyndardyń denesin qaıtarǵan alǵashqy jaǵdaı bolyp otyr. Izraıl tarapy qozǵalysty 10 qazanda kúshine engen atysty toqtatý jónindegi kelisimdi oryndaýdy ádeıi sozyp otyr dep aıyptady.
Kelisim sharttaryna sáıkes, HAMAS barlyq qaza tapqan tutqyndardyń máıitin qaıtarýy tıis bolatyn. Alaıda qazirgi ýaqytta 11 adamnyń denesi áli de Gaza sektorynda qalyp otyr.
Izraıldegi Tutqyndar men habarsyz ketkender otbasylarynyń forýmy bul jańalyq týystaryna az da bolsa jubanysh beredi degen úmitte.
Máıitterdi Halyqaralyq Qyzyl Krest komıteti qyzmetkerleri Izraıl áskerılerine tabystaǵannan keıin, olar el aýmaǵyna jetkizilip, ústine ulttyq tý jabylǵan tabyttarmen áskerı ravvınniń qatysýymen qoshtasý rásimi ótkizildi.
Izraıl premer-mınıstri keńsesi qaza bolǵandardyń otbasylaryna kóńil aıtyp, úkimettiń barlyq qaza tapqan tutqyndardyń denesin laıyqty jerleý úshin qaıtarýǵa bar kúshin salatynyn atap ótti. Sondaı-aq HAMAS kelisimge sáıkes óz mindettemelerin oryndap, deldal elder arqyly máıitterdi tolyq qaıtarýy tıis ekeni eskertildi.
Eske sala ketsek, buǵan deıin Izraıl Gaza sektorynda áýe soqqylary toqtaǵan soń atysty toqtatý rejımin qaıta engizgen bolatyn. Al HAMAS óz kezeginde tutqyndardyń denelerin izdeý jumystaryn keńeıtken.