HAMAS Izraıl soqqysyna qaramastan atysty toqtatý boıynsha óz ustanymynan aınymaıdy

ASTANA. KAZINFORM – HAMAS qozǵalysy Izraıldiń Qatar astanasy Dohadaǵy kelissózder tobyna jasaǵan soqqysyna qaramastan, atysty toqtatý jónindegi kelissózderge qatysty ustanymy men talaptaryn ózgertpeıtinin málimdedi, dep habarlaıy Sınhýa.

Bul týraly 11 qyrkúıekte qozǵalystyń joǵary laýazymdy ókili Faýzı Barhým arnaıy málimdeme jasady.

- Bul jaýyzdyq bizdiń berik ustanymymyz ben talaptarymyzdy ózgertpeıdi. Biz taǵy da agressııaǵa tótep berý, basqynshylar áskerin Gazadan tolyq shyǵarý, tutqyndarmen shynaıy almasý, halqymyzǵa gýmanıtarlyq kómek kórsetý jáne qıratylǵan ınfraqurylymdy qalpyna keltirý qajettigin atap ótemiz, – dedi Barhým.

- AQSh ákimshiligi basqynshylardyń áreketi men bizdiń halqymyzǵa qarsy jasalyp otyrǵan qylmysqa qoldaý kórsetip, moraldyq jáne saıası jaýapkershilikti moınyna ala otyryp, atalǵan qylmystyń tolyqqandy qatysýshysy bolyp otyr, - delingen málimdemede.

9 qyrkúıekte Izraıl áskerı-áýe kúshteri Doha qalasyndaǵy HAMAS sheneýnikteri paıdalanǵan ǵımaratqa áýe soqqysyn jasady.

Izraıl tarapy soqqynyń maqsaty – qozǵalys jetekshilerin joıý bolǵanyn habarlady.

HAMAS málimeti boıynsha, shabýyl kezinde delegatsııa AQSh usynǵan atysty toqtatý týraly jańa týraly jańa usynysty talqylap jatqan. Qozǵalys músheleri aman qalǵan, alaıda alty adam qaza tapqan.

Osyǵan deıin Qatar astanasynda jarylys bolǵany týraly jazdyq.

Sondaı-aq elde HAMAS ókilderi júrgeni úshin Netanıahý Qatarǵa qoqan-loqy kórsetti.