HAMAS: Izraıl shabýylynan keıin tutqyndardy almastyrý kelissózi toqtady
ASTANA. KAZINFORM — HAMAS qozǵalysy Izraıldi ótken aptada Qatar astanasy Dohadaǵy kelissóz kezinde óz delegatsııasyna shabýyl jasady dep aıyptap, Izraılmen tutqyndardy aýystyrý kelissózin toqtatqanyn málimdedi, dep habarlaıdy Sınhýa.
— Eger kelissózderge jaýapty delegatsııaǵa deldal eldiń ózinde shabýyl jasalsa, onda mundaı jaǵdaıda kelissózder jalǵasýy múmkin emes, — dedi HAMAS qozǵalysynyń joǵary ókili Taher an-Nýný.
Ótken seısenbide Izraıl HAMAS jetekshileri AQSh qoldaǵan atysty toqtatý usynysyn talqylaý úshin paıdalanǵan Dohadaǵy turǵyn úılerge áýeden soqqy jasady.
HAMAS-tyń joǵary laýazymdy sheneýnigi Halıl ál-Haııa bastaǵan delegatsııa aman qaldy, biraq HAMAS-tyń bes múshesi men Qatar qaýipsizdik qyzmetkeri qaza tapty, dep habarlady uıym.
T. an-Nýný Izraıl premer-mınıstri Bınıamın Netanıahýdy bitimge de, tutqyndarmen almasýǵa da qol jetkizý áreketterine kedergi keltirdi dep aıyptady. Ol Izraıldiń Gazadaǵy turǵyn úılerge soqqy berýiniń kúsheıýi ondaǵy ızraıldik tutqyndarǵa qaýip tóndirýi múmkin ekenin eskertti.
— Jalǵyz qısyndy sheshim — halyqaralyq qaýymdastyqtyń osy soǵysty toqtatý sheshimin qabyldap, júzege asyrýy, — dedi ol.
T.an-Nýný sondaı-aq AQSh memlekettik hatshysy Marko Rýbıonyń jeksenbi kúni Izraılge saparyna teris baǵa berip, HAMAS Izraıldiń ustanymynda eshqandaı ózgeris kútpeıdi dep málimdedi.
Izraıl sońǵy kúnderi Gaza qalasyndaǵy turǵyn úılerge áýe soqqylaryn údetti. Palestınadaǵy dárigerlerdiń aıtýynsha, bul shabýyldarda ondaǵan adam qaza tapty. Izraıl bul áreketterin HAMAS tobynyń áskerı bazalary men sodyrlaryna qarsy baǵyttalǵan dep túsindiredi. Al palestınalyqtar bolsa, shabýyldyń kóp zardabyn beıbit turǵyndar tartyp jatqanyn aıtady.
Qatar, Mysyr jáne AQSh Gazadaǵy sońǵy soǵys bastalǵannan beri bitim men tutqyndardy aıyrbastaýǵa deldaldyq jasap keledi, biraq Dohaǵa jasalǵan shabýyl ilgerileý bolashaǵyna kúmán keltirdi.
HAMAS qozǵalysy Izraıldiń Qatar astanasy Dohadaǵy kelissózder tobyna jasaǵan soqqysyna qaramastan, atysty toqtatý jónindegi kelissózderge qatysty ustanymy men talaptaryn ózgertpeıtinin málimdedi.