HAMAS Gazaǵa arnalǵan gýmanıtarlyq kómek qoryn joıýdy talap etti
ASTANA. KAZINFORM — Palestınalyq radıkaldy HAMAS qozǵalysy Izraıl men AQSh basqaratyn Gaza gýmanıtarlyq kómegi qorynyń (GHF) taratylýyn talap etti. Qozǵalys qordy beıbit turǵyndardyń qazasyna sebepshi boldy dep aıyptady, dep habarlaıdy TASS.
HAMAS ókilderi Qatarda bitimge qatysty kelissózderdi jalǵastyryp jatyr.
— Sıonıstik-amerıkalyq kúshterdiń gýmanıtarlyq kómek taratý pýnktteriniń mańynda beıbit turǵyndardy júıeli túrde óltirýi — bul qordyń qorshaý, ashtyq pen qyrǵyn uıymdastyrýdaǵy qylmystyq rólin dáleldeıdi. Bul jaǵdaı búkil arab álemi men halyqaralyq qaýymdastyqtan bul adamgershilikke jat mehanızmdi joıý jáne onyń avtorlaryn jaýapkershilikke tartý úshin dereý áreket etýdi talap etedi, — delingen HAMAS málimdemesinde.
Buǵan deıin katarlyq Al Jazeera telearnasy habarlaǵandaı, senbi kúni Gaza sektoryndaǵy Rafah qalasynyń Ál-Shakýsh aýdanynda GHF-ke tıesili nysannyń aldynda Izraıl áskeri oq jaýdyryp, 34 palestınalyqty óltirgen. Adam quqyǵyn qorǵaý uıymdary bul nysandardy «adam etin qyrǵan oryndar» jáne «ólimge toly tuzaqtar» dep atady.
Gaza densaýlyq saqtaý mınıstrliginiń málimetinshe, mamyr aıynyń sońynda GHF óz jumysyn bastaǵannan beri, osy qor nysandarynda 800-den astam palestınalyq qaza taýyp, shamamen 5 myń adam jaralanǵan.
2025 jyldyń 2 naýryzynan beri Izraıl sheshimimen Gaza sektoryna halyqaralyq gýmanıtarlyq kómek kirgizilmeı otyr. Barlyq baqylaý-ótkizý beketteri jabyq, al azyq-túlik tek GHF pýnktteri arqyly ǵana taratylady.
Buǵan deıin Izraıl men HAMAS arasynda Gaza sektorynda atysty toqtatý jóninde kelisimge jaqyndaǵany habarlanǵan bolatyn.
Aıta ketelik DDSU Gaza sektoryna 11 júk kóligimen medıtsınalyq kómek jetkizgen edi.