HAMAS Gazadaǵy gýmanıtarlyq blokada alynbaıynsha kelissózderge qatysýdan bas tartty
ASTANA. KAZINFORM — HAMAS qozǵalysy jappaı ashtyq jaǵdaıynda kelissózderdi qaıta bastaý múmkin emes ekenin málimdegennen keıin, AQSh pen Izraıl deldaldary Dohadan ketti, dep habarlaıdy Kazinform tilshisi.
Dohadaǵy HAMAS delegatsııasy deldaldarǵa atysty toqtatý sharttaryn talqylaýǵa qaıta oralmaıtynyn jetkizdi, sebebi Gaza sektoryndaǵy azyq-túlik daǵdarysy sheshilmegen. Bul týraly Izraılge barǵan jáne joǵary laýazymdy tulǵalarmen kezdesken AQSh elshisi Stıv Ýıtkoff málimdedi.
Telegram-daǵy resmı arnasynda jarııalanǵan málimdemesinde HAMAS «kómek ony shyn qajet etetinderge jetip, Gaza sektoryndaǵy gýmanıtarlyq daǵdarys pen ashtyq toqtaǵan sátte soǵysty toqtatý jónindegi kelissózderdi dereý bastaýǵa daıyn ekenin» málimdedi.
— Ashtyq jaǵdaıynda kelissózderdi jalǵastyrý mánin de, maǵynasyn da joǵaltady. Ásirese, ótken aptada «okkýpatsııalyq kúshter» eshqandaı negizsiz kelissózderden shyqqan kezde, biz kelisimge qol jetkizýge jaqyn qalǵan edik, — delingen HAMAS málimdemesinde.
Izraıl shynymen de ótken aptada kelissózderden shyǵyp ketken. Bul HAMAS atysty toqtatý týraly sońǵy usynysqa «oń» ári «konstrýktıvti» jaýap berdim degen málimdemesinen keıin bolǵan.
Kelissózderde ne boldy?
Dıplomatııalyq shıelenis aıasynda Izraıl deldaldarǵa atysty toqtatý jónindegi sońǵy kelisim jobasyna engizilgen túzetýlerge óz jaýabyn joldady. Atap aıtqanda, atalǵan jaýapta HAMAS-tyń Izraıl armııasyn Gaza sektorynyń ońtústigindegi eldi mekenderden tolyq shyǵarý týraly talabyn qabyldaýdan bas tartylǵan.
HAMAS-tyń jaýaby Izraıl men AQSh tarapynan teris reaktsııa týǵyzdy, osydan keıin AQSh delegatsııasy Dohadan ketti.
Keıin AQSh tarapy HAMAS-ty adal emes áreket etip otyr dep aıyptap, bul uıym soǵysty toqtatýdyń kelissózden tys balama joldaryn qarastyryp jatyr degen málimdeme jasady, dep habarlaıdy Al Jazeera.
Deldal eldermen qarym-qatynastaǵy shıelenis
The Times of Israel basylymy arab dıplomatyna jáne kelissózderge qatysy bar ekinshi derekkózge silteme jasap habarlaýynsha, HAMAS pen deldal elder — Mysyr men Qatar arasyndaǵy qarym-qatynastarda da jaǵdaı ýshyǵyp barady.
Kelissózderge qatysy bar derekkózderdiń málimetine sáıkes, HAMAS delegatsııasynyń basshysy Halıl ál-Haııa Mysyrdy Gaza sektoryndaǵy gýmanıtarlyq daǵdarysqa qatysy bar dep aıyptaǵan. Bul Kaır tarapynan qatty narazylyq týǵyzǵan.
Sondaı-aq HAMAS Qatardyń BUU-nyń HAMAS-ty qarýsyzdanýǵa jáne bılikten bas tartýǵa shaqyrǵan qararyn qoldaǵanyna ashyq qarsylyq bildirdi.
AQSh delegatsııasy Gaza sektorynda
Gýmanıtarlyq jaǵdaıdyń nasharlaýyna baılanysty Gaza sektoryna AQSh delegatsııasy bardy.
Izraıldiń 12-arnasynyń málimetinshe, AQSh-tyń arnaıy ókili Stıv Ýıtkoff pen Izraıldegi elshi Maık Hakabı Rafah qalasyndaǵy kómek taratý ortalyǵyn jáne AQSh pen Izraıldiń qoldaýymen jumys isteıtin Gazaǵa gýmanıtarlyq kómek qory basqaratyn basqa da nysandardy aralaǵan.
Steve Witkoff at the food distribution center in Rafah pic.twitter.com/CITxdj8WwT
— Amit Segal (@AmitSegal) August 1, 2025
— Sapardyń maqsaty — jumys istep turǵan kómek taratý beketteriniń jumysyn baǵalaý jáne azyq-túlik jetkizilimin arttyrý josparyn ázirleý, — dep habarlady Aq úı. — Delegatsııa músheleri anklav turǵyndarymen de kezdesip, jaǵdaı týraly tikeleı aqparat alýdy kózdeıdi.
Sapar sońynda Stıv Ýıtkoff pen Maık Hakabı AQSh prezıdenti Donald Trampqa jaǵdaı boıynsha esep berip, gýmanıtarlyq kómekti jetkizýdiń jańa amerıkalyq bastamasyn bekitý aldynda usynys jasaıdy dep josparlanyp otyr.
Bul arada Gaza sektorynyń Densaýlyq saqtaý mınıstrligi ashtyqtan eki jańa ólim jaǵdaıyn rastady. Vedomstvonyń dereginshe, qaqtyǵys bastalǵaly beri 159 adam ashtyqtan kóz jumǵan, olardyń 90-y — balalar.
Buǵan deıin Dúnıejúzilik densaýlyq saqtaý uıymy shilde aıynda ǵana anklavta 63 adamnyń ashtyqtan qaıtys bolǵanyn habarlaǵan edi.