HAMAS Gazadaǵy atysty toqtatý týraly kelisimge qol jetkizilgenin rastady

ASTANA. KAZINFORM — Palestınalyq HAMAS qozǵalysy Gaza sektorynda atysty toqtatý týraly kelisimge qol jetkizilgenin rastady, dep habarlaıdy TASS. 

Bul málimdeme radıkaldy toptyń Telegram-kanalynda jarııalanǵan.

— HAMAS Sharm-el-Sheıhte baıypty jáne jaýapty kelissózder júrgizdi. Onyń qorytyndysy boıynsha Gaza sektoryndaǵy soǵysty toqtatý týraly kelisimdi jarııalaýǵa daıyn. Biz Qatar, Mysyr jáne Túrkııadan kelgen deldaldardyń jumysyn joǵary baǵalaımyz. AQSh prezıdenti Donald Trampqa soǵysty toqtatýǵa jáne Gaza sektorynan okkýpatsııa kúshterin tolyq shyǵarýǵa qol jetkizgeni úshin alǵys aıtamyz, — delingen habarlamada.

Uıym qujatta Izraıl áskerlerin shyǵarý, anklavqa gýmanıtarlyq kómek aǵyny jáne ızraıldik kepilge alynǵandardy palestınalyq tutqyndarǵa aıyrbastaý qarastyrylǵanyn habarlady. Osyǵan baılanysty HAMAS AQSh prezıdenti Donald Tramptan, kelisimge kepil berýshi memleketterden, sondaı-aq arab jáne ıslam elderinen Izraıldi kelisim boıynsha barlyq mindettemelerin oryndaýǵa mindetteýdi jáne bul máselede eshqandaı kidiristerge jol bermeýdi surady.

Sonymen qatar uıym Palestına halqynyń quqyqtarynan, onyń ishinde «bostandyq, táýelsizdik jáne ózin-ózi bıleý quqyǵynan» bas tartpaıtynyn rastady.

Aıta keteıik, buǵan deıin AQSh prezıdenti Donald Tramp Izraıl men HAMAS beıbitshilik josparynyń birinshi kezeńi boıynsha kelisimderge qol qoıdy dep súıinshiledi.