HAMAS Gazada Izraıldiń soqqylarynan 25 adamnyń qaza tapqanyn habarlady

ASTANA. KAZINFORM — Palestınalyq HAMAS qozǵalysy Izraıldiń Gaza sektoryna jasaǵan áýe soqqylary saldarynan keminde 25 adam qaza tapqanyn málimdedi, dep habarlaıdy TASS agenttigi.

— Izraıldiń Gaza jáne Han-ıÝnıs qalalaryna jasaǵan soqqylarynan áıelder men balalardy qosa alǵanda, keminde 25 adam qaza tapty. Bul soqqylar — (Izraıl premer-mınıstri Bınıamın) Netanıahýdyń palestınalyqtarǵa qarsy genotsıdti qaıta jandandyryp, jaǵdaıdy ýshyqtyrǵan áreketi, — delingen habarlamada.

HAMAS óz jasaqtary ızraıldik áskerılerge shabýyl jasady degen aıyptaýlardy teriske shyǵaryp, atysty toqtatý rejımi kúshine engen sátten beri anklavta 300-den astam palestınalyq qaza tapqanyn alǵa tartty.

Eske sala keteıik, Tramp pen Netanıahý Aq úıdegi kezdesýde Gazadaǵy soǵysty toqtatý týraly kelisimge kelgen-di. Degenmen sodan beri Izraıl basshysy Palestına memleketin qurý múmkindigi máselesi jóninde áli tis jarǵan joq.

Al Frantsııa prezıdenti Emmanıýel Makron qyrkúıek aıynda Nıý-Iorkte ótken BUU Bas Assambleıasynyń otyrysynda sóılep, óz eliniń Palestına memleketin resmı túrde moıyndaıtynyn málimdedi.

Jalpy, BUU Bas Assambleıasynyń 80-sessııasynda Frantsııa, Lıýksembýrg, Malta, Monako, Andorra, San-Marıno jáne Belgııa Palestına memleketin resmı túrde tanydy. Buǵan deıin Kanada, Avstralııa, Portýgalııa jáne Ulybrıtanııa osyndaı sheshim qabyldaǵan edi.

Qazirgi tańda Palestınany BUU-ǵa múshe 193 memlekettiń shamamen 160-y moıyndap otyr. Bul álem elderiniń 81 paıyzyna teń.