HAMAS Gaza sektoryndaǵy úkimetin taratqanyn málimdedi
ASTANA. KAZINFORM — Palestınanyń HAMAS qozǵalysy AQSh qoldaǵan soǵystan keıingi retteý jospary aıasynda Gaza sektoryndaǵy úkimetin taratqanyn jarııalady, dep habarlaıdy Kazinform agenttiginiń menshikti tilshisi.
Qozǵalys on jyldan astam ýaqyt boıy Gaza sektoryndaǵy atqarýshy bıliktiń jumysyn úılestirip kelgen Tótenshe jaǵdaılar jónindegi úkimettik komıtettiń taratylǵanyn málimdedi.
Bul týraly dúısenbi kúni Gaza qalasynda ótken baspasóz máslıhatynda HAMAS úkimetiniń medıa keńsesiniń basshysy Ismaıl as-Savabta habarlady.
Onyń aıtýynsha, sheshim AQSh qoldaǵan beıbitshilik josparyna sáıkes qurylǵan Gaza sektoryn basqarý jónindegi Ulttyq komıtetke ákimshilik ókilettikterdi berýdi jeńildetý maqsatynda qabyldanǵan.
As-Savabta buryn taǵaıyndalǵan mınıstrlikter men memlekettik qyzmetkerler óz jumysyn qalypty rejımde jalǵastyratynyn jáne Ulttyq komıtettiń basshylyǵymen qyzmet atqarýǵa daıyn ekenin aıtty. Sonymen birge HAMAS óz baqylaýyndaǵy aýmaqtarda qaýipsizdik pen polıtsııa máselelerine jaýap berýdi jalǵastyrady.
Ulttyq komıtettiń basshysy Alı Shaat komıtet quramyndaǵy 15 palestınalyq mamannyń jumysty bastaýǵa tolyq daıyn ekenin málimdedi. Onyń sózinshe, jańa organnyń tıimdi qyzmeti úshin «biryńǵaı bılik, biryńǵaı zań jáne sol bılikke baǵynatyn biryńǵaı qarý» qajet.
Óz kezeginde Board of Peace HAMAS-tyń sheshimin quptaǵanymen, bılikti berý úderisin «ýáde boıynsha emes, naqty is-áreketter boıynsha» baǵalaıtynyn jetkizdi.
Izraıl ázirge HAMAS sheshimine resmı pikir bildirgen joq. Buǵan deıin qozǵalys Izraıldi atysty toqtatý rejımin buzdy jáne beıbitshilik josparynyń ózge de talaptaryn oryndamady dep aıyptaǵan bolatyn. Al Izraıl býferlik aımaqtan áskerin shyǵarmaıtynyn jáne qaýipsizdikke qater dep eseptegen nysandarǵa soqqy berýdi jalǵastyratynyn málimdep keledi.
The Times of Israel jáne Reuters málimetinshe, HAMAS úkimetiniń taratylýy negizinen sımvoldyq sıpatqa ıe jáne qozǵalystyń Gaza sektoryndaǵy azamattyq basqarýdy Ulttyq komıtetke berýge daıyn ekenin kórsetýge baǵyttalǵan.
Degenmen bul úderistiń júzege asýy HAMAS-ty qarýsyzdandyrý jáne atysty toqtatý kelisiminiń sharttaryn oryndaýǵa qatysty taraptar arasyndaǵy kelispeýshilikterge baılanysty ázirge tejelip otyr.
Eske salsaq, Qazaqstan Gaza sektoryna qatysty keshendi beıbitshilik josparyn iske asyrýǵa járdemdesý úshin qurylǵan Beıbitshilik keńesiniń quramyna kiredi.
