HAMAS Gaza qalasynda repressııa júrgizdi: 32 adam qaza tapty

ASTANA. KAZINFORM — Gaza qalasynda HAMAS uıymynyń júrgizgen operatsııasy saldarynan 32 adam qaza tapty. Qurbandardyń barlyǵy — uıymnyń básekeles klanynyń ókilderi. Izraılmen jasalǵan atysty toqtatý kelisimine qaramastan, óńirdegi ahýal kúrdeli kúıinde qalyp otyr. Sońǵy 10 kúnde kóptegen qaqtyǵystar tirkelgen, dep habarlaıdy Euronews.

Keminde 32 adam Gaza qalasynda HAMAS júrgizgen bir aptalyq repressııalyq sharalar kezinde mert boldy. Uıym olardy «qaýipti top» dep ataǵan. Bul oqıǵa Izraıl men ıslamdyq qozǵalys arasyndaǵy atysty toqtatý týraly kelisim kúshine engennen birneshe kún ótken soń oryn aldy.

HAMAS basshylyǵy bul áskerı qımyldardyń naqty nysanyn atamaǵanymen, buqaralyq aqparat quraldary men kýágerlerdiń aıtýynsha, uıym shamamen 2000 jaýyngerin Doǵmýsh klanyna qarsy baǵyttaǵan. Bul klan — HAMAS-tyń aımaqtaǵy basty qarsylastarynyń biri sanalady. Shabýylshylar ondaǵan adamdy qamaýǵa alyp, jaralaǵan.

Operatsııalar barysynda HAMAS alty jaýyngerinen aıyrylǵany týraly habarlandy, alaıda bul málimetterdi rastaý múmkin bolmaı otyr.

Bitim jasalǵan sátten bastap HAMAS baqylaýyndaǵy Іshki ister mınıstrligi aımaq boıynsha 7 myńǵa jýyq sarbazyn ornalastyrǵan. Uıym ókilderi muny «tártipsizdikterdiń aldyn alý jáne bılik vakýýmyn boldyrmaý sharasy» dep túsindiredi.

Euronews habarlaýynsha, Izraıl bolashaq kelisimder aıasynda HAMAS-ty qarýsyzdandyryp, taratýǵa nıetti. Al uıym sońǵy kúnderi óz qarsylastary men ashyq qarsy shyǵýshylarǵa qarymta sharalar jasap, bılikte qalýdyń amalyn qarastyrýda.

Aıta keteıik, HAMAS Qyzyl Krest uıymyna ızraıldik kepilge alynǵandardyń ekinshi tobyn tapsyrdy.