HAMAS Gaza boıynsha jan-jaqty kelisimge daıyn ekenin jetkizdi
ASTANA. KAZINFORM – Palestına toby Gazadaǵy soǵysty toqtatyp, Izraıl áskerin shyǵarý úshin kepilge alynǵandardyń barlyǵyn bosatýǵa daıyn ekenin málimdegenimen, Izraıl bıligi óz sharttaryn talap etip, bul usynysty qabyldamady, dep habarlaıdy Kazinform agenttiginiń menshikti tilshisi.
Sársenbi kúni palestınalyq HAMAS qozǵalysy soǵysty toqtatyp, Izraıl áskerin tolyqtaı shyǵarý úshin kepilge alynǵandardyń barlyǵyn bosatýǵa daıyn ekeni týraly málimdeme jasady.
HAMAS uıymy «basqynshylyq bıliktiń qolynda ustaǵan palestınalyq tutqyndardyń kelisilgen sanyna aıyrbas retinde ustalǵan barlyq sodyr bosatylatyny týraly» jan-jaqty kelisim jasaýǵa daıyn ekenin basa aıtady.
– Bul kelisim Gaza sektoryndaǵy soǵysty toqtatady, okkýpatsııa kúshteriniń Gaza sektorynan shyǵarylýyna, Gaza sektoryna qajetti barlyq taýardyń ımporty úshin shekara ótkelderiniń ashylýyna jáne qaıta qurý protsesin bastaýyna ákeledi, - delingen HAMAS málimdemesinde.
Top Gaza sektoryn basqarý úshin «tehnokrattardyń táýelsiz ulttyq ákimshiligin» qurýǵa daıyn ekenin atap ótti.
Uıymnyń málimdemesi AQSh prezıdenti Donald Tramp HAMAS-ty kepilge alynǵan 20 adamdy bosatýǵa shaqyrǵannan keıin kóp uzamaı jasaldy.
Izraıl premer-mınıstri Bınıamın Netanıahý keńsesi HAMAS-tyń málimdemesin synǵa aldy.
– Ókinishke oraı, bul HAMAS-tyń kezekti qadamy, eshqandaı jańalyq joq, - dedi ol.
Netanıahý keńsesi Gazadaǵy soǵys bes shart oryndalǵanda ǵana aıaqtalatynyn qaıtalady: kepilge alynǵandar bosatylady, HAMAS qarýsyzdandyrylady, Gaza sektory demılıtarızatsııalanady, Izraıl anklavty baqylaýǵa alady jáne balama azamattyq ákimshilik qurylady.
– Tek osy sharttar ǵana HAMAS ózi ashyq ýáde etkenindeı, 7 qazandaǵy qyrǵyndy qaıta qaıtalaýyna jol bermeıdi, - dedi Netanıahý keńsesi.
Izraıl Qorǵanys mınıstri Israel Kats HAMAS-ty jaqyn arada qatań tańdaý kútip turǵanyn eskertti: ne Izraıldiń soǵysty aıaqtaýy, sonyń ishinde kepilge alynǵandardy bosatý jáne qarýsyzdaný týraly sharttaryn qabyldaýy nemese Gaza qalasynyń «Rafah pen Beıt Hanýn sııaqty» bolýy.
Gazaǵa shabýyl
Izraıl qazir Gaza qalasyn basyp alý úshin keńeıtilgen shabýylǵa daıyndalyp jatyr. TsAHAL qazirdiń ózinde rezervke myńdaǵan adam shaqyrdy. Shabýyl qyrkúıek aıynyń ortasynda bastalýy múmkin.
Tamyz aıynda HAMAS Izraılmen 60 kúndik atysty toqtatýǵa kelisti, onyń ishinde Gaza sektorynda kepilge alynǵandardyń jartysyn qaıtarý jáne Izraıldiń keıbir palestınalyq tutqyndardy bosatý kelisimi bar.
HAMAS qabyldaǵan usynys Izraıldiń áskerı operatsııalaryn 60 kúnge toqtatýdy qamtydy jáne eki jylǵa jýyq ýaqytqa sozylǵan qaqtyǵysty toqtatý úshin jan-jaqty kelisimniń negizin belgiledi. Birneshe kúnnen keıin Netanıahý Izraıl Gazadaǵy kepilge alynǵandardy bosatý jáne soǵysty toqtatý úshin, biraq Izraıl úshin qolaıly sharttarmen kelissózderdi dereý jalǵastyratynyn aıtty.
– Bul ýaqytta anklavta urys jalǵasyp jatyr. Beısenbi kúni tańerteńnen beri Izraıldiń búkil aımaqtaǵy shabýyldarynan keminde 31 palestınalyq qaza tapty. Onyń 19-y Gaza qalasynda, - dep habarlaıdy AlJazeera.
Eske sala keteıik, buǵan deıin BUU Izraıldiń Gazadaǵy áreketinen keminde 21 myń bala múgedek bolyp qalǵanyn habarlaǵanyn jazǵan edik.