HAMAS delegatsııasy Kaırde Gazadaǵy atysty toqtatýdy júzege asyrý boıynsha kelissóz ótkizdi

ASTANA. KAZINFORM – Kelissóz Gaza sektoryndaǵy jaǵdaıdyń shıelenisýi aıasynda ótip jatyr jáne ol Tramptyń beıbitshilik josparynyń ekinshi kezeńine de qatysty, dep habarlaıdy Kazinform menshikti tilshisi.

Jeksenbi kúni palestınalyq HAMAS tobynyń joǵary laýazymdy delegatsııasy Kaırde Mysyrdyń Bas barlaý qyzmetiniń basshysy Hassan Rashadpen kezdesti. Kelissóz atysty toqtatý týraly kelisimniń birinshi kezeńin oryndaý jáne Izraıl tarapynan jańa zańbuzýshylyqtar týraly habarlamalarǵa arnalǵan, dep habarlaıdy Reuters.

Palestına qozǵalysynyń málimetinshe, delegatsııa quramyna HAMAS Basshylyq keńesiniń tóraǵasy Muhammed Darvısh, Haled Mashal, Halıl ál-Haııa, Nızar Avadalla, Zahır Djabarın jáne Gazı Hamad kirdi.

Kezdesý barysynda HAMAS kelisimniń birinshi kezeńine beıildiligin rastady, biraq Izraıl tarapynan jasalǵan otyrǵan zaǵbuzýshylyqtar kelisimniń turaqtylyǵyna qaýip tóndiretinin eskertti. Top sondaı-aq zańbuzýshylyqtardy bekitý jáne aldyn alý úshin halyqaralyq deldaldar baqylaıtyn tetik qurýdy usyndy.

Kezdesýde Rafah aýdanyndaǵy týnnelderde «sary syzyqtyń» ar jaǵynda qalyp qoıǵan HAMAS áskerı qanaty – «Izz ad-Dın ál-Qassam brıgadalary» jaýyngerlerine qatysty jaǵdaı talqylandy. Olarmen baılanys úzilgeni týraly habarlandy. Izraıl áskerıleri buǵan deıin qalanyń shyǵysyndaǵy jerasty qurylystarynan qashýǵa tyrysqan 17 sodyrdyń óltirilgenin nemese tutqyndalǵanyn málimdegen bolatyn.

22 qarashada Izraıldiń Gaza sektoryna jasaǵan soqqylarynan kem degende 20 adam qaza tapty, olardyń arasynda HAMAS-tyń jergilikti komandıri de bar.

- HAMAS bitimdi buzǵan joq jáne biz soǵan sáıkes áreket etip jatyrmyz. Sodyrlardyń «sary syzyqqa» kirýge birneshe áreketi sátsiz aıaqtaldy jáne olar aýyr soqqyǵa jyǵyldy, - dep málimdedi Izraıl premer-mınıstri Bınıamın Netanıahý sońǵy shıeleniske qatysty pikir bildire otyryp.

Gaza sektory bıliginiń málimetinshe, atysty toqtatý bastalǵannan beri qaza tapqandar sany 342 adamǵa jetti, olardyń kóbi – áıelder, balalar jáne qart adamdar.

Kelisimniń birinshi kezeńin júzege asyrýǵa qatysty máseleler tutqyndarmen almasýǵa da qatysty boldy.

Anadolu agenttiginiń habarlaýynsha, HAMAS Izraılge kepilge alynǵan 20 tirideı jáne 28 deneniń 27-sin tapsyrdy, bul rette Izraıl tarapy onyń ekeýin daýlap otyr. Izraıl óz kezeginde ómir boıy bas bostandyǵynan aıyrýǵa sottalǵandardy qosa alǵanda, shamamen 2 myń palestınalyqty bosatty.

Kelisimniń ekinshi kezeńi boıynsha talqylaý Tramptyń amerıkalyq josparyna sáıkes Gaza sektory úshin tehnokratııalyq Palestına basqarý komıtetin qurýdy, Izraıl áskerlerin «sary syzyqtan» tysqary shyǵarýdy, halyqaralyq turaqtandyrý kúshterin ornalastyrýdy, Palestına polıtsııasyn daıarlaýdy jáne sektordy demılıtarızatsııalaýdy kózdeıdi.

HAMAS óz kezeginde «Izraıl okkýpatsııasy aıaqtalmaıynsha» qarýyn tastamaıtynyn birneshe ret málimdedi.

Buǵan deıin Izraıl Beırýttyń aýdandarynyń birine soqqy jasaǵanyn jazǵan edik.

Sondaı-aq Izraıldiń Lıvan astanasy Beırýtqa jasaǵan áýe soqqysynan 5 adam qaza tapqanyn habarladyq.