HAMAS bitimge kelý týraly usynysty qabyldamady
ASTANA. KAZINFORM – HAMAS tobynyń basshylyǵy atysty 6 aptaǵa toqtatý týraly usynysty qabyldaǵan joq. Olar Izraıl áskeriniń Gazadan shyǵarylýyn talap etip otyr. Bul týraly Euronews jazdy.
Toptyń resmı ókilderi baspasózge jasaǵan málimdemesinde Izraıldiń HAMAS-tyń turaqty atysty toqtatý, áskerdiń Gaza sektorynan shyǵarylýyn, «soltústiktegi turǵyndardyń úılerine qaıtarý jáne halyqty negizgi qajettiliktermen qamtamasyz etý» talaptaryn oryndaýdan bas tartqanyn atady. Degenmen, HAMAS bitimshilermen kelissózderdi jalǵastyratynyn atap ótti.
Olar bitimge qasıetti Ramazan aıy bastalǵanǵa deıin keletinine úmittendi, sebebi bul aıda Ierýsalımdegi qasıetti oryndarǵa kirýge baılanysty palestınalyq-ızraıldik qaqtyǵystar jıileı túsedi.
Osy arada palestınalyq áriptesi Mahmýd Abbasty qabyldap otyrǵan Túrkııa prezıdenti Rejep Taııp Erdoǵan Izraıldi Ierýsalımdegi qasıetti jerlerge musylmandardyń kirýine shekteý qoıý áreketteri týraly eskertti. Túrkııa basshysy Taıaý Shyǵystaǵy janjaldy sheshý úshin táýelsiz Palestına memleketin qurý qajet ekenin taǵy da atap ótti. Ol sondaı-aq aımaqtaǵy toptar arasyndaǵy yntymaqtastyq «Izraıldiń ezgisine eń jaqsy jaýaptardyń biri» bolatynyn aıtty.
«Izraıldiń radıkaldy saıasatkerleriniń Ǵıbadathana taýyna musylmandardyń kirýine shekteý qoıý týraly talaptary — sandyraq. Mundaı qadamnyń saldary óte aýyr bolatyny sózsiz», - dedi Túrkııa prezıdenti.
Soǵystyń 5 aıynda anklavtyń kóp bóligi úıindige aınalǵan. Gýmanıtarlyq kómekti jerústi jetkizý soǵys qımyldary men bul máseleni TsAHAL-men úılestirý múmkin emestigine baılanysty óte qıynǵa soqty.
BUU málimetinshe, Gaza sektorynyń 2,3 mln halqynyń tórtten biri ashtyqqa ushyraǵan.
Anklavtyń soltústik bóliginiń turǵyndaryna gýmanıtarlyq kómektiń taǵy bir partııasy áýeden túsirilgeni belgili boldy. Operatsııaǵa AQSh, Iordanııa, Mysyr jáne Frantsııanyń ushaqtary qatysty. AQSh resmı tulǵalarynyń habarlaýynsha, olar áýeden 36 800 birlik azyq-túlik tastaǵan.
