HAMAS basshysy Ismaıl Hanııa Qatarda jerlendi

ASTANA. KAZINFORM – Qatar astanasynda palestınalyq HAMAS qozǵalysy saıası bıýrosynyń basshysy Ismaıl Hanııany jerleý rásimi ótti. Ol Dohanyń shetindegi Lýsaıl zıratyna jerlendi. Bul týraly Aljazeera jazdy. 

Buǵan deıin saıasatkerdiń tabyty Qatardyń Uly memlekettik meshitine qoıylǵan bolatyn. Onda janaza namazy oqyldy. Jerleý rásimine myńdaǵan adam jınaldy.

Rásimge Qatar ámiri, premer-mınıstr, Iran prezıdentiniń birinshi orynbasary, Túrkııanyń syrtqy ister mınıstri jáne basqa da joǵary laýazymdy tulǵalar qatysty.

Aza tutý rásiminde HAMAS basshylyǵynyń músheleri, onyń ishinde marqumnyń yqtımal murageri dep tanylǵan Halıd Mıshal da boldy.

Sońǵy jyldary Hanııa HAMAS qozǵalysynyń saıası keńsesi ornalasqan Qatar astanasynda ómir súrdi.

Indonezııa, Lıvan, Malaızııa, Pákistan, Túrkııa jáne Iemenniń hýsıtter baqylaýyndaǵy aımaqtarynda da aza tutý rásimderi ótti.

Rásimnen bir kún buryn Tegeranda qoshtasý rásimi ótti.

31 shildede palestınalyq HAMAS qozǵalysy saıası bıýronyń basshysy Ismaıl Hanııanyń mert bolǵanyn habarlady.

Buqaralyq aqparat quraldarynyń habarlaýynsha, Hanııa Tegeranda bolǵan kezde jarylǵysh zat iske qosylyp, qaza tapqan.

HAMAS Hanııanyń ólimi úshin kek alýǵa ýáde berdi. Hanııanyń Iranda óltirilýi Tegeran men Izraıl arasyndaǵy shıelenisti odan ári kúsheıtip jiberdi.

Aıta keteıik, osyǵan oraı keshe Túrkııa men Pákistan halqy da aza tutqanyn habarlaǵan edik.