HAMAS atysty toqtatýǵa kelisetinin málimdedi
ASTANA. KAZINFORM — Gaza sektorynda atysty toqtatý týraly kelissózdegi ilgerileý týraly málimdemeler usynylǵan sharttarǵa qatysy joq ekenin moıyndaǵan Izraıl men AQSh-tyń ótkir reaktsııasyn týdyrdy, dep habarlaıdy Kazinform tilshisi.
HAMAS atysty toqtatýǵa kelisetinin jarııalady, biraq bul jańalyq Izraıl men AQSh tarapynan kúmánmen qabyldandy. Palestınalyq ókil HAMAS-tyń AQSh-tyń arnaıy ókili Stıv Ýıtkof usynǵan atysty toqtatý kelisimin qabyldaǵanyn aıtty. Alaıda Izraıl bul bastamanyń AQSh-pen baılanysyn joqqa shyǵaryp, usynylǵan sharttardy eshbir úkimet qabyldaı almaıtynyn málimdedi, dep jazady Reuters agenttigi.
Ýıtkof te usynys oǵan tıesili emes ekenin aıtyp, qujattyń mazmuny onyń ıdeıalaryna sáıkes kelmeıtinin rastady.
HAMAS usynǵan jospar 70 kúnge atysty toqtatyp, kepilge alynǵan ızraıldikterdi eki kezeńmen bosatýdy, sondaı-aq palestınalyq tutqyndardy, sonyń ishinde uzaq merzimge sottalǵan júzdegen adamdy bosatýdy qamtıdy.
Izraıl bul usynysty qabyldamaı, ony el saıasatyna qaıshy dep baǵalady. Izraıl premer-mınıstri Bınıamın Netanıahý tek ýaqytsha atysty toqtatýǵa daıyn ekenin aıtty jáne soǵys HAMAS tolyq joıylǵansha jalǵasatynyn qaıtalady.
Eske sala ketsek, naýryz aıynda Izraıldiń Gaza sektoryna jasaǵan áskerı áreketteri saldarynan qaza tapqandar sany 250 adamnan asty, al atysty toqtatý týraly kelisim buzyldy.
HAMAS buǵan deıin 2023 jylǵy 7 qazandaǵy shabýyldar kezinde kepilge alynǵan barlyq qalǵan tutqyndy bosatýǵa jáne Izraıl áskeriniń Gaza sektorynan tolyq shyǵýy shartymen turaqty atysty toqtatýǵa kelisetinin málimdegen.
Izraıl premer-mınıstri Bınıamın Netanıahý óz kezeginde Izraıl kepilge alynǵandardy bosatý úshin ýaqytsha atysty toqtatýdy ǵana talqylaýǵa daıyn ekenin basa aıtty. Ol soǵys HAMAS tolyǵymen joıylǵannan keıin ǵana aıaqtalatynyn qaıtalady.
Gaza sektorynda gýmanıtarlyq jaǵdaı kúrdelenip otyr. Izraıl anklavqa gýmanıtarlyq kómek joldaryn jaýyp tastaǵannan keıin turǵyndar arasynda ashtyq jáne tamaq tapshylyǵy baıqalyp jatyr. AQSh qoldaǵan jańa gýmanıtarlyq qor kómek jetkize bastaǵanymen, BUU jáne basqa da uıymdar bul bastamaǵa qosylýdan bas tartty.