HAMAS áskeri Palestınada emes, shetelde daıyndalǵan bolýy múmkin - Talǵat Qalıev

Palestına men Izraıl arasyndaǵy qan tógilgen qaqtyǵysqa qatysty pikir bildirgen Qoldanbaly etno-saıası zertteýler ınstıtýtynyń dırektory Talǵat Qalıev shıelenistiń nemen aıaqtalatyny týraly boljam aıtty, dep habarlaıdy Kazinform agenttigi.

Talǵat Qalıev áýeli qalyptasqan jaǵdaıdyń sebebine toqtaldy. Onyń aıtýynsha, bul qaqtyǵysqa álem elderinde bolyp jatqan shıelenister túrtki bolǵan.

«Buǵan Reseı men Ýkraına arasyndaǵy jaǵdaı da biraz áser etti. Kórip otyrǵandaı, Ázerbaıjan Qarabaqta soǵys jarııalap, búkil jerin qaıtaryp aldy. Sonymen birge, Qytaı men Taıvan arasyndaǵy sóz qaıtadan kóterile bastady. Ol jaǵdaılar dúnıejúzindegi osyndaı qaqtyǵystarǵa erekshe ımpýls berdi. Onyń ústine, qazir Saýd Arabııasy men Izraıl kelisimsharttarǵa qol qoımaq bolyp jatqan kez. Sondyqtan olardy qastastyrý Iranǵa óte tıimdi. Óıtkeni, Iran Saýd Arabııasymen básekeles, tipti qas deýge de bolady. Eki eldiń qarym-qatynasy óte nashar. Izraılmen de durys emes, sondyqtan osy eki eldiń jaqyndasyp ketkenin jaqtamaı otyr», - dep qaqtyǵystyń sebebine toqtaldy Talǵat Qalıev.

Sarapshy AQSh bıligi Izraılge ushaq tasyǵysh áskerı keme, atom súńgýir qaıyqtaryn jibergenin atap ótti. Talǵat Qalıevtiń paıymynsha, bul – amerıkalyqtardyń soǵysqa kirisýge daıyn ekenin kórsetetin belgi.

«Myna «HAMAS» pen «Hezbollany» árqashan qoldaıtyn – Iran. Bul shabýyl úlken daıyndyqty qajet etedi. Olar – («HAMAS» - avtor túsindirmesi) sodyrlar. Al sodyrlar aıaq astynan uıymdasa salmaıdy. Áskerı nusqaýshylardyń daıyndyǵynan ótýi kerek jáne barlaý aqparattary bolýy tıis. Sosyn tolassyz zymyran atyp jatyr. Olardyń qaıdan kelgeni erekshe suraq. HAMAS-tyń áskerleri Palestınada emes, shetelde daıyndalǵan bolýy múmkin. Eger ol Palestınada daıyndyq júrgizse, onda Mossad (Izraıldiń ulttyq barlaý qyzmeti) ony biler edi», - dedi Talǵat Qalıev.

Osy rette sarapshy atalǵan qarýly qaqtyǵystyń nemen aıaqtalýy múmkin ekenin aıtty.

«Eger bir memleket qosylyp ketpese, HAMAS Izraıldi jeńe almaıdy. Óıtkeni, ol – top. Al Izraıldiń áskeri óte myqty. Sondyqtan túbinde Izraıl jeńedi dep oılaımyn. Qazirgi jaǵdaı ońaı emes, tutqynǵa alynǵandar bar. Eger basqa bir elder kirisip ketse, onda bul úlken soǵysqa da aınalyp ketýi múmkin», - dep óz paıymyn aıtty T. Qalıev.

Saıasattanýshy bul qaqtyǵystyń Qazaqstanǵa tıgizer teris saldaryna da toqtaldy.

«Jalpy, bizdiń Izraılmen qarym-qatynasymyz jaqsy. Iranmen de qatynas bar, ol bizge kórshi el sanalady. Bizge soǵystyń bolmaǵany tıimdi. Qandaı jaǵdaı bolsa da beıbit, dostyq qarym-qatynasty qoldaımyz. Bastysy – halyqtyń qyrylmaǵany, qannyń tógilmegeni», - dep sózin túıindedi Talǵat Qalıev.

Eske salaıyq, senbi kúni HAMAS sodyrlary Izraılge zymyranmen shabýyl jasady. Eki kúnnen asqan shıeleniste 700-den astam adam qaza tapty.

Artynsha Izraıl resmı túrde «soǵys jaǵdaıy» rejımin engizdi.